Колледж үлэһиттэрэ наҕараадаланнылар

Алтынньы 2 күнүгэр Хотугулуу-Илиҥҥи федеральнай университет инфраструктурнай колледжыгар Арассыыйаҕа орто профессиональнай үөрэхтээһин систиэмэтин 85 сыллаах үбүлүөйүн чиэстээһин үөрүүлээх быһыыга-майгыга буолан ааста. Колледж преподавателлэригэр федеральнай уонна өрөспүүбүлүкэ биэдэмистибэлэрин наҕараадаларын, махтал суруктары уонна ХИФУ грамоталарын туттардылар.

ХИФУ ректора Анатолий Николаев орто профессиональнай үөрэхтээһин университет тиһигэр суолтатын уонна кини үрдүк үөрэх биир улахан хайысхатынан буоларын тоһоҕолоон бэлиэтээтэ. Салайааччы инфраструктура технологияларын колледжын кэлэктиибигэр мультимедийнай экран туруорарга сертификаты туттарда, бу саҥардыллыбыт аактабай саалаҕа эбии буолуоҕа.

«Элбэх выпускник биһиги баай историялаах колледжпытын бүтэрбиттэрэ. Кини Арассыыйа Федерациятыгар бастыҥнартан биирдэстэрэ буоларын киэн тутта этэбит, КИТ киирэр абитуриеннар ортолоругар сыллата үрдүк куонкурус бэлиэтэнэр. Үөрэх тиһигэр улахан уларыйыылар кэлэн иһэллэр, биһиги устудьуоннарбыт мэлдьи хаачыстыбалаах үөрэҕи ылан, үрдүк үөрэххэ көһөллөрүгэр элбэх үлэ барыахтаах», – диэн санаатын үллэһиннэ Анатолий Николаев.

Саха Өрөспүүбүлүкэтин Судаарыстыбаннай Мунньаҕын (Ил Түмэн) наукаҕа, үөрэххэ, култуураҕа, маассабай иһитиннэрэр средстволарга уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева ХИФУ колледжын үлэһиттэрэ өрөспүүбүлүкэ уонна дойду социальнай-экономическай сайдыытыгар улахан кылааттарын киллэрэллэрин, бары салааларга үрдүк ирдэбиллээхтэрин тоһоҕолоон эттэ. Антонина Григорьева өрөспүүбүлүкэ үрдүк үөрэхтэрин, колледжтарын үлэтинэн киэн туттарын эттэ, ХИФУ КИТ кэлэктиибэ үрдүк идеалларга бэриниилээҕин, оччолорго үөрэх тиһигин көхтөөхтүк сайыннарыыга көмөлөспүт Михаил Николаев уонна кини бииргэ үлэлэспит соратниктара,  1990-с сылларга Саха сирин үөрэҕириитин систиэмэтэ көхтөөхтүк сайдарыгар бэйэлэрин харыстаабакка үлэлээбиттэрин тоһоҕолоон бэлиэтээтэ. «Кэлэктиип үлэтин хаачыстыбата үөрэх тэрилтэтигэр киириигэ, туттарсыыга үрдүк куонкурустааҕынан, эһиги бэлэмниир идэлэргит ирдэбиллээҕинэн сыаналанар. ХИФУ инфраструктурнай технологияларын колледжа устудьуоннарга биэрэр үөрэх таһымын бүтүн өрөспүүбүлүкэ үрдүктүк сыаналыыр", – диэн эбэн эттэ Антонина Григорьева.

Информационнай систиэмэлэри туһаныы уонна хааччыйыы кафедратын лабораториятын сэбиэдиссэйэ Айталина Унарова бырааһынньык күн Арассыыйа наукаҕа уонна үрдүкү үөрэхтээһиҥҥэ Министиэристибэтин Махтал суругун тутта. Кини үөрэх тиһигэр 20 сыл үлэлиир уонна билиҥҥи үйэҕэ информационнай технология оруола улаатыаҕа дии саныыр. «Ол иһин биһиги кафедрабыт уонна идэбит ирдэбилэ улаатан иһэр. Бастакы үөрэхпинэн культурологпын эрээри, бэйэм кэммэр саҥа хайысха тирээн турар буолуоҕун өйдөөн, саҥалыы үөрэммитим", –диэн Айталина Унарова быһаарда.

Хаартыскалар: www.s-vfu.ru