Кириһиэнньэ сөтүөтүгэр пассажирдары тиэйэр оптуобустар ананнылар

Тохсунньу 18 - 20 күннэригэр Кириһиэнньэ сөтүөтүгэр кыттыыны ылыан баҕалаахтары тиэйиигэ Куораттааҕы суол-тырааныспар сулууспата оптуобустары анаата.
Ол курдук, тохсунньу 18 күнүгэр күнүс 12:30 чаастан киэһэ 22:00 чааска диэри уонна тохсунньу 19 күнүгэр сарсыарда 08:00 чаастан киэһэ 22:00 чааска диэри пассажирдары "Умуллубат уот" таһыттан Күөх хонууга диэри анал оптуобустар таһыахтара.
Бэлиэтээн эттэххэ, бүгүҥҥү күҥҥэ үгэс буолбут Кириһиэнньэ сөтүөтэ тэриллэр миэстэтэ ыраастанна, Чернышевскай уонна Аржаков уулуссаларын быһа охсуһар сирдэринэн киирэр суол оҥоһуллар. 
Дьокуускай уонна Ленскэй епархията сөтүө сирин тохсунньу 18 күнүгэр күнүс 13.00 чаастан сибэтии гыныаҕа, диэн Гражданскай оборонаҕа уонна нэһилиэнньэни ыксаллаах быһыыттан-майгыттан көмүскээһиҥҥэ управление иһитиннэрэр.