Киллэмҥэ култуура дьиэтэ аһылынна

Манна Туймаада хочотун номохторугар анаммыт история, туризм киинэ, ону тэҥэ «Киллэм – история тиэргэнэ» түмэл баар буолла. Ол курдук, олохтоохторго уонна ыалдьыттарга Киллэм история хабааннаах сирдэригэр сатыы маршрут оҥоһуллубут.  

Үөрүүлээх аһыллыыга киин куорат баһылыга Дмитрий Садовников, «Управление делами» МКУ салайааччыта Егор Попов уонна Тулагы Киллэм нэһилиэгин баһылыга Пётр Попов кыттыыны ыллылар.

«Арассыыйаҕа Норуоттар сомоҕолоһууларын сылыгар, оттон Саха сиригэр Култуура сылыгар маннык эбийиэк аһыллыбыта ордук үөрүүлээх. Култуура саҥардыллыбыт дьиэтэ эдэр көлүөнэҕэ уонна ыалдьыттарга Дьокуускай биир кырдьаҕас муннугун уруккутун көрдөрүөҕэ», – диэтэ Садовников.

Бэлиэтээн эттэххэ, манна кулууп дьиэтэ 1910 сыллаахха тутуллубут. Өрөбөлүүссүйэ кэнниттэн атыыһыт хаһаайынын көскө ыыппыттар, ол кэннэ бу дьиэҕэ үөрэх тэрилтэтэ аһыллыбыт. 1934 сыллаахха оскуола Тулагыга көһөрүллүбүтүн кэннэ, манна «Родник» кулууп үлэтин саҕалаабыт.  

Олохтоох дьаһалта «Олоҥхо сирэ» история-култуура заповеднигын тэрийэр былааннаах, ол «Үс Хатыҥ» архитектура-этнография комплексыттан саҕаланыахтаах. Бырайыак үтүө үгэстэри, норуот уус-уран оҥоһуктарын, төрүт дьарык араас көрүҥнэрин сөргүтэр соруктаах.