«Килбиэннээх үлэ куоратын» тэрилтэлэрин ахсааныгар киирэр – үрдүк чиэс

Маннык этии баһылык Евгений Григорьев биэс сыллаах үлэтин отчуотунан промышленнай салаа тэрилтэлэрин кытта көрсүһүүтигэр киирдэ.

Санатар буоллахха, «Сахабулт», оччолорго Дьокуускайдааҕы Тирии-атах таҥаһын кэмбинээтэ, Аҕа дойду Улуу сэриитин сылларыттан үлэлиир.

Дьокуускай куоракка «Килбиэннээх үлэ куората» РФ бочуоттаах аат 2022 сыл сэтинньи 15 күнүгэр дойду баһылыга Владимир Путин ыйааҕынан иҥэриллибитэ. Бу аатынан кыайыыны ситиһиигэ олохтоохтор улахан кылааттарын киллэрбит, байыаннай уонна гражданскай бородууксуйаны тохтоло суох оҥорон таһаарыыны хааччыйбыт куораттар наҕараадаланаллар.

Арассыыйаҕа маннык ааты 70 куорат сүгэр.

Аҕа дойду Улуу сэриитин сылларыгар Дьокуускай тэрилтэлэрэ оборона Судаарыстыбаннай кэмитиэтин Кыһыл Знамятынан наҕараадаламмыттара. Дьокуускай бүтүн оборона промышленнаһыгар көмүһү хостуур базаҕа кубулуйбута. Сэрии сылларыгар манна 40 туонна көмүһү хостообуттара, дойдуга сүлүүдэ – флогопит аҥаарыттан ордуга хостоммута.

Оборона министиэристибэтин архыыбыгар Аҕа дойду Улуу сэриитин сылларыгар «АлСиб» 1-кы авиационнай перегоночнай дивизияны Кыһыл Знамя уордьанынан наҕараадалааһын туһунан докумуоннар булуллубуттара. Сэрии сылларыгар Алсиб – Аляска – Сибиир салгын трассата Дьокуускайынан ааһара.

Өрөспүүбүлүкэ киин куоратыгар сэрии сылларыгар ВВС РККА  Красноярскайдааҕы салгын трассатын штаба, «Якутзолото» Бүтүн Сойуустааҕы судаарыстыбаннай көмүс промышленнаһын  управлениета, Саха сирин өрүс пароходствотын управлениета уонна да атын тэрилтэлэр үлэлээбиттэрэ. Фроҥҥа Дьокуускайтан өрөспүүбүлүкэ 60 тыһыынчаттан тахса олохтооҕо барбыта, куорат олохтоохторо фроҥҥа көмөлөһөргө элбэх үбү туттарбыттара.

Дьокуускайга Кыайыы пааркатыгар бу үрдүк наҕараадаҕа аналлаах мемориал тутуллубута.