Килбиэннээх үлэ куораттара

Аҕа дойду Улуу сэриитин кэмигэр ыраах тыылга сылдьар сэбиэскэй дьон фронт туһа диэн күүстэрин уонна доруобуйаларын харыстаабатахтара.

Бары биир сыалы тутуһаннар, дьахталлар, кырдьаҕастар уонна оҕолор станокка тураннар, дойдуларын көмүскүү барбыт эр дьоннорун солбуйаллара. Кинилэр үлэҕэ хорсун быһыыларын көмөтүнэн баараҕай экономическай акылаат оҥоһуллубута.

Олус ыарахан усулуобуйаҕа хас биирдии тэрилтэ, хас биирдии холкуос бэйэлэрэ туһунан фронт буолбуттара, кинилэр Кыһыл Аармыйаҕа эрэллээх тыыл буолбуттара, Ийэ дойдубутун ыраастыырга, 1945 сылга Кыайыы былааҕын Рейхстаг үрдүнэн ыйыырга бары күүстэрин уурбуттара.

2020 сыл кулун тутар 1 күнүгэр Улуу Кыайыы 75 сылын көрсө Арассыыйа Бэрэсидьиэнэ Владимир Путин тыыл үлэһиттэрин хорсун быһыыларын үйэтитэр сыалтан «Килбиэнннээх үлэ куората» РФ бочуоттаах аатын туһунан» федеральнай сокуоҥҥа илии баттаабыта. Онно олоҕуран бу аатынан кыайыыны ситиһиигэ олохтоохтор улахан кылааттарын киллэрбит, байыаннай уонна гражданскай бородууксуйаны тохтоло суох оҥорон таһаарыыны хааччыйбыт, онуоха маассабай үлэ дьоруойун, дьулуурун көрдөрбүт куораттар наҕараадаланаллар.

Арассыыйаҕа маннык ааты 70 куорат сүгэр.

Дьокуускай куоракка «Килбиэннээх үлэ куората» бочуоттаах аат 2022 сыл сэтинньи 15 күнүгэр  иҥэриллибитэ, онуоха сөптөөх ыйаахха Арассыыйа Бэрэсидьиэнэ Владимир Путин илии баттаабыта.

Аҕа дойду Улуу сэриитин сылларыгар Дьокуускай тэрилтэлэрэ оборона Судаарыстыбаннай кэмитиэтин Кыһыл Знамятынан наҕараадаламмыттара. Дьокуускай бүтүн оборона промышленнаһыгар көмүһү хостуур базаҕа кубулуйбута. Сэрии сылларыгар манна 40 туонна көмүһү хостообуттара, дойдуга сүлүүдэ – флогопит аҥаарыттан ордуга хостоммута.

Оборона министиэристибэтин архыыбыгар Аҕа дойду Улуу сэриитин сылларыгар «АлСиб» 1-кы авиационнай перегоночнай дивизияны Кыһыл Знамя уордьанынан наҕараадалааһын туһунан докумуоннар булуллубуттара. Сэрии сылларыгар Алсиб – Аляска – Сибиир салгын трассата Дьокуускайынан ааһара.

Өрөспүүбүлүкэ киин куоратыгар сэрии сылларыгар ВВС РККА  Красноярскайдааҕы салгын трассатын штаба, «Якутзолото» Бүтүн Сойуустааҕы судаарыстыбаннай көмүс промышленнаһын  управлениета, Саха сирин өрүс пароходствотын управлениета уонна да атын тэрилтэлэр үлэлээбиттэрэ. Фроҥҥа Дьокуускайтан өрөспүүбүлүкэ 60 тыһыынчаттан тахса олохтооҕо барбыта, куорат олохтоохторо фроҥҥа көмөлөһөргө элбэх үбү туттарбыттара.