Киирбит үп оскуола салҕааһынын тутууга туһаайыллыаҕа

Куорат баһылыга Евгений Григорьев быһа биэриигэ иһитиннэрбитинэн, бырайыак-смета докумуоннара оҥоһуллубуттар. Тутуу сыаната – 600 мөл. солк. кэриҥэ. 

«Билигин баар бырагыраамаларга уонна маастар-былааҥҥа бу сыалга үбүлээһин суох. Инфраструктура сайдыытыгар хомуур итинник эбийиэктэргэ үп-харчы мунньарга кыах биэрэр», – диэтэ кини.

Баһылык быһаарбытынан, дуогабары түһэрсии түмүгэр ирдэнэр суума хомулуннаҕына, куорат бүддьүөтүгэр уларытыыны киллэриэххэ, куонкурус биллэриэххэ уонна тутууга хантараак түһэрсиэххэ сөп буолар.

Бэлиэтээн эттэххэ, былырыын Дьокуускайга уопсайа 415 тыһ. кв. миэтэрэ* иэннээх дьиэ-уот тутуллан үлэҕэ киирэн, рекорд олохтоммута. 

Куораты тутуу уонна архитектура департамена сабаҕалыырынан, быйыл ити көрдөрүү ааһа барыан сөп.  

*Бу көрдөрүү 2025 с. ахсынньытааҕы чахчылар чопчуланнахтарына уларыйыан сөп.