Киин уокурукка куорат маастар-былаанынан баараҕай үлэ күүтүллэр

Олунньу 20 күнүгэр Киин уокурук олохтоохторун иннигэр Олохтоох дьаһалта баһылыгын отчуотун баһылыгы бастакы солбуйааччы Георгий Гаврильев оҥордо. 
2024 сылга Киин уокурукка үөрэх эйгэтигэр 29 №-нээх оскуола сүрүн дьиэтэ тутуллубута, 2025 сылга 1 №-дээх оскуола саҥа дьиэҕэ киирэргэ бэлэмнэнэр. 
Суол тутуутун эйгэтигэр быйыл Петр Алексеев уулуссатын Семен Данилов уулуссатыттан Окружной шоссеҕа диэри кэрчигэр, Хабаров - Ярославскай - Чернышевскай - Ефимов уулуссалар быһа охсуһууларыгар, Хабаров уулуссатын Ярославскай уулуссаттан Богатырев уулуссатыгар диэри кэрчигэр баараҕай өрөмүөн күүтүллэр.
Чугастааҕы сылларга куорат маастар-былаанын иитиинэн 48 нүөмэрдээх 4 сулустаах «Cosmos» гостиница комплекса, 245 куойкалаах инфекционной балыыһа, 620 миэстэлээх психоневрологическай диспансер дьиэлэрэ уонна 2 №-дээх өрөспүүбүлүкэтээҕи балыыһаҕа суһал көмө салаата тутуллара былааннанар.
2030 сылга диэри 9 саахалланар туруктаах элбэх кыбартыыралаах дьиэ көһөрүллүөҕэ. Чернышевскай уул., 12, 12/1, 14/2 уонна Аммосов уул, 6/1 дьиэлэрин тиэргэннэригэр тупсарыы үлэтэ ыытыллыаҕа.
Хаарбах уонна саахалланар туруктаах дьиэлэртэн көһөрүү бырагырааматын иитинэн уокурук олохтоохторо Петр Алексеев уул., 85/1 дьиэтин көһөрүү, 2 №-дээх оскуола уонна Музыка колледжын хапытаалынай өрөмүөннэрин,  Ярославскай уонна Хабаров уулуссаларын тиэргэннэрин тупсарыы былаанын уонна 26 №-дээх оскуола таһынааҕы арыгы маҕыһыынын суох оҥорору ыйыталастылар. 
Олохтоохтор маны сэргэ оҕо саадтарын өрөмүөнүн, тутуутун, Кырдьаҕас куоракка култуурнай тэрээһиннэри ыытыыны, Куорат музейыгар сөптөөх дьиэни булан биэриини, 5 №-дээх оптуобус маршрутугар сыһыаннаах ыйытыылары биэрдилэр. 
Биир олохтоохтон куорат киинигэр, ордук поликлинкалар курдук социальнай эбийиэктэр тастарыгар массыына тохтобулларын тэрийэр булгуччулааҕын ыйда, диэн Олохтоох дьаһалта пресс-сулууспата иһитиннэрэр.