Киин уокурук Дьахталларын сэбиэтэ 20 сылын бэлиэтээтэ

Сэбиэт 2005 сыллаахха уокурук көхтөөх кэрэ аҥаардарын күүһүнэн тэриллибитэ. Бу сыллар тухары кинилэр уокурук олохтоохторун, ордук чуолаан оҕолоох дьиэ кэргэттэр, дьахтар аймах кыһалҕаларын быһаарар сыаллаах киэҥ хабааннаах уопсастыбаннай үлэнэн дьарыктанан кэллилэр, үгүс ахсааннаах быыстапка, кэнсиэр, аахсыйа тэрилиннэ. Ол курдук, сэбиэт түөрт сүрүн хайысханан үлэлиир: элбэх оҕолоох ыаллар, «Аҕа – бигэ дьиэ кэргэн тирэҕэ», көлүөнэлэр ситимнэрэ уонна «СВОих не бросаем».

Үбүлүөйдээх тэрээһининэн Сэбиэт көхтөөх чилиэннэрин Олохтоох дьаһалта уопсастыбаннай сибээскэ уонна ыччат политикатыгар управлениетын начаалынньыга Петр Попов, Киин уокурук дьаһалтатын салайааччыта Айсен Куличенко, Арассыыйа дьахталларын сойууһун бюротун аатыттан Анжелика Андреева, СӨ Уопсастыбаннай палаататын чилиэннэрэ, Ил Түмэн дьокутаата Афанасий Постников, Ф.И. Авдеева аатынан Оҕо айымньытын дыбарыаһын салайааччыта Татьяна Иванова эҕэрдэлээннэр, махтал суруктары уонна көхтөөх уопсастыбаннай үлэлэрин иһин наҕараадалары туттардылар. Ол туһунан Олохтоох дьаһалта пресс-сулууспата иһитиннэрэр.