Киин куорат Өймөкөөн улууһун кытта илии баттаста

Өрөспүүбүлүкэ киин куоратын баһылыга Евгений Григорьев уонна Өймөкөөн улууһун баһылыга Александр Оконешников бэҕэһээ, муус устар 18 күнүгэр, бииргэ үлэлэһии сөбүлэҥин баттастылар. 
Кэлиҥҥи сылларга Дьокуускай куорат уонна Өймөкөөн улууһа үөрэхтээһин, спорт, култуура, туризм эйгэтигэр ыкса үлэлэһэн эрэллэр. Евгений Григорьев, Дьокуускай, куорат өрөспүүбүлүкэ киинэ буоларынан, Өймөкөөн кэрэ-бэлиэ миэстэлэрин, айылҕатын көрөр баҕалаах туристар аттанар сүрүн миэстэлэринэн буоларын быһыытынан, куорат социальнай-экономическай сайдыытыгар бу сөбүлэҥ дьоһун суолталааҕын санатта. Евгений Григорьев маны сэргэ бииргэ үлэлэһии, саҥа туристыыр бырайыактары оҥоруу  Дьокуускайга даҕаны, Өймөкөөн улууһугар даҕаны туристар сырыылара уһууругар, туризм хаачыстыбата тупсарыгар кыах биэриэҕин бэлиэтээтэ. 
Бииргэ үлэлэһии сөбүлэҥэ туризмы таһынан култуура, үөрэх эйгэлэрин хабар. Биир дьоһун түгэнинэн Дьокуускайга Өймөкөөн улууһун бэрэстэбиитэллэригэр аналлаах офис, туристарга гостиница тэриллэллэрэ буолуоҕа, диэн иһитиннэрэр Олохтоох дьаһалта пресс-сулууспата.