"Киин куорат" кумааҕынан бүтэһик нүөмэрэ таҕыста

Дьокуускай куорат дьаһалтатын быһаарыытынан хаһыаппыт 2026 сыл тохсунньу 1 күнүттэн электроннай эрэ көрүҥүнэн тахсар буолла.

1999 сылга «Киин куорат» хаһыаты эмиэ үп-харчы көстүбэт ыарахан кэмнэригэр оччотооҕу мэр Илья Филиппович Михальчук тэрийбитэ. Бу санаатахха, Илья Филиппович сахаҕа элбэҕи оҥорбут эбит – Үс Хатыҥҥа Туймаада ыһыаҕа, «Арчы дьиэтэ» духуобунай култуура киинэ, Күөх хонуу даамбата, Теплай күөл фонтана о.д.а. Олортон өрөспүүбүлүкэ нэһилиэнньэтин үс гыммыт биирэ олорор киин куоратыгар олохтоох омук тылынан тахсар хаһыаты төрүттээһинэ биир кэскиллээхтэрэ диэн санаанан салайтаран биһиги бу сыллар тухары туппут тэтиммитин ыһыктыбакка үлэлээн кэллибит. Ол баай уопуппут куорат Олохтоох дьаһалтатынан анаммыт саҥа дириэктэр Антон Жондоров көрүүтүгэр сөп түбэһиэхтээх диэн эрэллээхпит. Онон, күндү, тапталлаах ааҕааччыбыт, биһигини сүтэримэ, 2026 сыл тохсунньу 1 күнүттэн – «Киин куорат» саайтыгар уонна тг-ханаалыгар күүтэбит!

Араас кэмнэргэ үлэлээбит уһулуччулаах эрэдээктэрдэр Андрей Аргунов, Борис Павлов, Иван Ушницкай үтүө үгэстэрин салҕаан, эһиги өйөбүлгүтүнэн, тапталгытынан аныгы информация, оҥоһуу өй, технология, интэриниэт үйэтигэр миэстэбитин буолуохпут диэн эрэнэбит.