«Киин куорат күөх Кубогын» иккис түһүмэҕэ ыытылла турар

«Киин куорат күөх Кубога» – тэрилтэлэр тиэргэннэригэр көҕөрдүү уонна тупсаран оҥоруу хаачыстыбатын үрдэтиини ситиһэр, эбийиэктэри киэргэтиигэ уонна көҕөрдүүгэ уопут тарҕатыыны, атастаһыыны, новаторскай ньымалары киллэриини көҕүлүүр, көҕөрдүүгэ аныгы хайысхалары көрдүүр аналлаах куонкурус иккис түһүмэҕэ бу күннэргэ буола турар.
Көрөр, дьүүллүүр хамыыһыйа уус-уран киэргэтиини, сонун көстүүнү, онлайн-куоластааһыны, ландшафтнай дизайн быраабылаларын тутуһууну, куораты көҕөрдүүгэ кылааты о.д.а. көрөр.
Дьүүллүүр сүбэ бэрэстэбиитэлэ, Олохтоох дьаһалта Территориялары кытта үлэҕэ департаменын начаалынньыга Светлана Кармадонова бу күрэх быйыл төрдүс сылын ыытылларын тоһоҕолоон туран, хаһааҥҥытааҕар да элбэх – 77 сайаапка киирбитин бэлиэтээтэ. 
Санатар буоллахха, кыайыылаахтары үгэс быһыытынан Куорат күнүгэр наҕараадалыахтара.