Киин куорат баһылыга 100 бааллаах выпускниктары эҕэрдэлээтэ

«Эһиги чаҕылхай ситиһиигитинэн киэн туттабыт уонна сыралаах үлэҕит иһин махтанабыт!

Күндү оҕолор, хаалбыт эксээмэннэргитин ситиһиилээхтик туттаран, талбыт үөрэххитигэр киирэргитигэр баҕарабын!», – диэн суруйда МАХ ханаалыгар Евгений Григорьев.

Киин куорат кинилэринэн киэн туттар:

Елизавета Рудых – В.П. Ларионов аатынан физика-тэхиньиичэскэй лицей выпускнига, үрүҥ көмүс мэтээлгэ хандьыдаат, искусство (МХК) олимпиадатын өрөспүүбүлүкэтээҕи түһүмэҕин призера, нуучча тылыгар Бүтүн Арассыыйатааҕы үөрэнээччилэр олимпиадаларын муниципальнай түһүмэҕин призера.

Учуутала: Булдакова Матрена Анатольевна – нуучча тылын уонна литературатын үрдүк категориялаах учуутала, Саха Өрөспүүбүлүкэтин үөрэҕириитин туйгуна, СӨ Методиһа.

Полина Ерощенко – В.И. Кузьмин аатынан 30 №-дээх орто оскуола, Дьокуускай куорат. Полина инникитин Салайыы судаарыстыбанна университетыгар туттарсар, салгыы үрдүк көрдөрүүлэри ситиһэр баҕа санаалаах.

Учуутала: Бубякина Екатерина Иннокентьевна.

Игорь Гуляев – Дьокуускай куораттааҕы лицей; кыһыл көмүс мэтээлгэ хандьыдаат. Бүтүн Арассыыйатааҕы «Финатлон» экономикаҕа олимпиадатын түмүктүүр түһүмэҕин кыайыылааҕа.

Элиза Люйден – Дьокуускай куораттааҕы лицей выпускнига. Айар куттаах, уус-уран литературанан, ойуулуур-дьүһүннүүр искусствонан үлүһүйэр, Оҕо искусствотын оскуолатын бүтэрбит, лицейгэ 10 кылааска үөрэнэ кэлбит.

Учууталлара: Стручкова Айна Михайловна — нуучча тылын уонна литературатын үрдүк категориялаах учуутала, Саха Өрөспүүбүлүкэтин үөрэҕириитин туйгуна, РФ уопсай үөрэхтээһинин бочуоттаах үлэһитэ, РФ үөрэхтээһинин туйгуна.

Малышев Кирилл – Дьокуускай куорат 21 №-дээх орто оскуолатын выпускнига, бастакы кылаастан туйгуннук үөрэнэр. РФ Бырабыыталыстыбатын иһинэн Москватааҕы үп университетын юридическай факультетыгар туттарсар санаалаах.

Учуутала: Черных Александра Сергеевна – үрдүк категориялаах учуутал.

Урукку сылларга курдук, биир кэлим эксээмэҥҥэ 100 бааллаахтары бэлэмнээбит учууталларга Дьокуускай куорат баһылыгын бириэмийэтэ – 100 тыһыынча солкуобай туттарыллыаҕа.