Киин куорат аҥаара спордунан дьарыктанар

Куорат дууматын ыччат политикатыгар, физическэй култуураҕа уонна спорка сис кэмитиэтин уочараттаах мунньаҕар Олохтоох дьаһалта Физическэй култуураҕа уонна спорка управлениетын начаалынньыга Эдуард Ефимов ааспыт 2025 сылга Дьокуускай олохтоохторун 47,8% спордунан уонна физическэй култууранан тиһиктээхтик дьарыктаммытын бэлиэтээтэ.

Бу –192 721 киһи, ол иһигэр доруобуйаларын хааччахтаах дьон ахсаана үстэн элбэх төгүл элбээбит.

Манна ааспыт сылга Дьокуускай Жатайыгар бассейн, «Звезднай» түөлбэҕэ сабыылаах каток, «Дохсуҥҥа» футбол хонуута, куорат араас оройуоннарыгар хас даҕаны воркаут-былаһаакка, Олимпийскай эрэл училищетыгар физкултуурунай-чэбдигирдэр комплекс оҥоһуллубуттара төһүү буолбуттара саарбахтаммат.

Оттон статистика чахчытынан, Саха сирин үрдүнэн бүгүҥҥү күҥҥэ 2309 спорт эбийиэгэ үлэлиир, ол иһигэр: 888 спорт саалата, 657 аһаҕас халлаан анныгар былаһаакка, 54 бассейн, 32 ытар тир, 25 стадион, 22 хайыһар баазата, 9 сабыылаах каток, 622 спорт эбийиэгэ уо.д.а.үлэлиир.