Киин куоракка үс оскуола уонна икки оҕо саада тутуллуоҕа

Дьокуускай куорат маастар-былаанынан Ил Дархан Айсен Николаев тохсунньу 14 күнүгэр куорат баһылыга Евгений Григорьевы кытта көрүстэ. 
Ол курдук, 2025 сылга үс оскуола дьиэтэ тутуллуохтаах: физико-тэхиньиичэскэй лицейгэ эбии дьиэ, Чайковскай уул., 113 оскуола уонна 17 №-дээх оскуолаҕа эбии тутуу. 
Үүммүт сылга маны сэргэ икки оҕо саадын тутуу саҕаланыаҕа: «Севернай» кыбаарталга уонна Новокарьернай уулуссаҕа. 
Былааҥҥа итини таһынан түөрт култуура эбийиэгэ баар: Хатаска 350 миэстэлээх Оҕо искусствотын оскуолата, куоракка 1 №-дээх Оҕо искусствотын дьиэтэ уонна Кангалаас, Пригороднай бөһүөлэктэргэ култуура дьиэлэрэ.
Көрсүһүүгэ тырааныспар инфраструктуратын сайыннарыы боппуруоһа эмиэ таарылынна. Маастар-былаан быһыытынан, Покровскайдыыр суол Чернышевскай уулуссатыттан ГИБДД поһугар диэри кэрчигэ уонна Чернышевскай уулуссата Краснояров уулуссатыттан Покровскайдыыр суолга диэри кэрчигэ саҥардыллыахтара. 
Ураты болҕомтону хаарбах уонна саахалланар туруктаах дьиэттэн көһөрүү бырагырааматын олоххо киллэрии ылла. Дойду баһылыга Владимир Путин сорудаҕынан көһөрүү графига оҥоһуллубут. 2026 сылтан саҕаланар бырагырааманы олоххо киллэрии үһүс түһүмэҕин чэрчитинэн уопсайа 423 тыһ. кв. м иэннээх 957 дьиэ көтүрүллүөхтээх. Онно 32 тыһ. киһи олорор.
«2025 сылга Дьокуускай куоракка 15 бырайыак үлэлиэҕэ, ол иһигэр үс оскуола уонна икки оҕо саада тутуллуоҕа. Куорат уулуссаларын саҥардан тутуу уонна хаарбах дьиэттэн көһөрүү салҕаныаҕа. Тырааныспар реформатыгар болҕомто уурарга сорудахтаатым. Куорат уопсастыбаннай тырааныспарын саҥардыыга өрөспүүбүлүкэ салгыы көмөлөһүөҕэ. 17-с кыбаартал кэккэ дьиэлэрин көһөрүүнү тэтимирдиэххэ наада. Онтон сылтаан саҥа «Спортивнай» түөлбэ социальнай эбийиэктэрин тутуу атахтанар. Өрөспүүбүлүкэ киин куоратын сайыннарыыны тус хонтуруолбар тутабын», - диэн Айсен Николаев бэйэтин телеграм-ханаалыгар иһитиннэрэн турар.
Санатар буоллахха, 2021 сыллаахха Илиҥҥи экономическай форумҥа Владимир Путин Уһук Илин регионнарыгар олох таһымын үрдэтэр анал бырагырааманы биллэрбитэ. Ол чэрчитинэн 25 куорат 2030 сылга диэри үлэлиир маастар-былааны оҥостубута.
Уһук Илин биир кырдьаҕас куората Дьокуускай нэһилиэнньэтин ахсаана 2000 сылтан 1,7 төгүл элбээн, 396,7 тыһ. тэҥнэһэн турарынан, тэтимнээх сайдыылаах куораттар ахсааннарыгар киирэр, диэн Ил Дархан уонна Бырабыыталыстыба пресс-сулууспата иһитиннэрэр.

Хаартыска: Андрей Сорокин, СИА