Куорат кытыытыгар сынньалаҥ көҥүллэммит сирдэрин билис

Сөп ээ, айылҕа оҕолоробут, айылҕаҕа тардыһабыт. Бастыҥ сынньалаҥы айгыр-силик айылҕа эрэ биэрэр. 

Ол иннинэ манныгы билиэх кэриҥнээхпит: 

Дьокуускай куорат Олохтоох дьаһалтатын Гражданскай оборуонаҕа, нэһилиэнньэ уонна сир-уот харыстабылыгар управлениетын 2017 сыл кулун тутар 13 күнүнээҕи дьаһалыгар былырыын уларытыылар киирбиттэрин санатабыт.

Ол курдук, дьон сынньанарыгар анаммыт сирдэр уонна онно кимнээх эппиэтинэстээх буолаллара бигэргэммитэ. 

Дьэ, ол сирдэр ханна баалларый? 

*Чоҕу тиэнэр причал кэннигэр (Өлүөнэ эбэ). Эппиэттээх —  Кангаласс нэһилиэгин дьаһалтата.

* Покровскайдыыр аартык, 20 км (Докуускай — Покровскай суол уҥа өттө, Владимировка анараа өттө). Эппиэттээх — Хатас нэһилиэгин дьаһалтата.

* 202-с түөлбэҕэ баар куорат сөтүөлүүр сирин туоната. Эппиэттээх —«Техническэй хааччыйыы сулууспата» МУП. 

Оттон сынньанааччыларга туһаайан этиэхпитин баҕарабыт: бука диэн, сынньанан бүтэн бараргытыгар бөҕү-сыыһы, ол-бу салапааны, кураанах хаҕы, пластигы уо. д. а. олоччу  хомуйа-ньимийэ, чэбэрдик тутта сылдьыҥ. Ол туох да уустуга суох эбээт. Хас биирдии сынньанааччы оннук дьаһаннаҕына, бары да абыранабыт.

Хаһан да уонна бу кэнниттэн ити сиргэ сынньана кэлбэт, айылҕа маанылаах туонатыттан күүс-кыах ылбат курдук күннээҕинэн, түгэнинэн олорон бүтүөҕүҥ.

Сэниэ, күүс- кыах биэрэр сүдү баайбытын — Сир Ийэ айылҕабытын харах харатыныы харыстыаҕыҥ.