Киин куоракка босхо сир учаастагын биэрии хаамыыта

Ахсынньы 18 уонна 19 күннэригэр Сир сыһыаннаһыыларыгар агентствоҕа анал байыаннай дьайыы кыттыылаахтарыгар уонна элбэх оҕолоохторго босхо сир учаастагын тыырыы уочараттаах тэрээһинэ былааннанарын суруйан турабыт.

Ол курдук, элбэх оҕолоохторго Намсыыр трагын 8 км сир учаастактарын ахсынньы 18 күнүгэр талларыахтара. Ахсынньы 19 күнүгэр анал байыаннай дьайыы кыттыылаахтарыгар Киллэмҥэ уонна Табаҕаҕа сирдэри түҥэтиэхтэрэ.

Куорат баһылыга Евгений Григорьев:

– 2024 сыл ахсынньы ыйыттан саҕалаан сыл иһигэр 1 889 элбэх оҕолоох босхо сир учаастагынан хааччылынна, ол иһигэр: Бүлүү трагын 16 км 964 учаастактан 960-на, Намсыыр трагын 8 км 1014 учаастактан 929-һа. Салгыы 2026 сыл I кыбартаалыгар Тулагы Сыырдааҕар 100-чэкэ учаастагы оҥоруохпут. Тулагы Киллэмҥэ эбии үс сир оҥоһулунна, манна 1100 учаастак тахсыан сөп. Докумуона 2026 сыл ортотун диэки оҥоһулyннаҕына, сыл бүтүүтэ тыырыы саҕаланыан сөп. Дьокуускай куорат элбэх оҕолоохторо учаастак оннугар харчынан төлөбүрү ылар ньыманан хото туһанан эрэллэр – биир кэмнээх харчынан компенсацияны 1179 ыал талла. Санатар буоллахха, 2025 сыл кулун тутар 1 күнүттэн бу төлөбүр кээмэйэ 200 тыһ. солк. 300 тыһ. солк. диэри улааппыта.

Анал байыаннай дьайыы кыттыылаахтарыгар 1396 сир учаастага бэлэмнэнэн турар: Киллэмҥэ – 961, Табаҕаҕа – 435. 2025 сыл олунньу ыйыттан барыта 820 учаастак бэрилиннэ: Тулагы Киллэмҥэ – 509, Табаҕаҕа – 311.