Киин куоракка 33 приёмнай дьиэ кэргэҥҥэ 158 оҕо иитиллэр

Бу туһунан Дьокуускай куорат уокуруктааҕы дьаһалтатын Эпиэкэ уонна попечительство департаменын начаалынньыга Оксана Максимова «Актуальное интервью» биэриигэ кэпсээтэ.

Кини этэринэн, оҕону дьиэ кэргэҥҥэ ылыы – бу бастакы эрэ түһүмэх. Салгыы исписэлиистэр оҕону иитэ ылбыт дьиэ кэргэттэри арыаллыыллар, бастакы кэмҥэ күүс-көмө буолаллар, быраап, социальнай уонна уйулҕа өттүнэн өйөбүлү оҥороллор. Департамеҥҥа маннык дьиэ кэргэттэри кытта быһаччы үлэлиир анал салаа баар.

Бэлиэтээн эттэххэ, 2020 сыллаахха олунньуга Дьокуускайга Эпиэкэ уонна попечительство сүбэтэ тэриллибитэ. Бу приёмнай дьиэ кэргэттэр бэйэ-бэйэлэрин кытта алтыһар, уопут атастаһар уонна тыын боппуруостары дьүүллэһэр эбии былаһааккаларыгар кубулуйбут.

Маны таһынан, тулаайах эбэтэр көрүүтэ-истиитэ суох хаалбыт оҕону дьиэ кэргэҥҥэ ылыан баҕалаах гражданнарга босхо үөрэтэр куурустар ыытыллаллар. Оксана Максимова кэпсээбитинэн, хандьыдааттары кытта уйулҕа үөрэхтээхтэрэ, юристар уонна эпиэкэ уорганнарын исписэлиистэрэ үлэлииллэр. Бырагыраамаҕа лиэксийэлэр, практическай дьарыктар уонна трениннэр киирэллэр, оттон үөрэнии бииртэн үс ыйга диэри салҕанар.