Кэтээн көрүү камератын ахсаанын 1000 тиэрдэр сорук турар

Олохтоох дьаһалтаҕа баһылык Евгений Григорьев салалтатынан буолбут манна сыһыаннаах мунньахха этиллибитинэн, биэс сыллааҕыта баара эрэ 100 камера үлэлиирэ. Оттон бүгүн сылаас тохтобуллар улахан аҥаардара камеранан хааччыллан турар (42 сылаас тохтобулга 93 камера).

Кэтээн көрүү камералара вандаллааһын, сокуону кэһии атын даҕаны түгэннэрин быһаарарга, тохтобул санитарнай туругун кэтээн көрөргө сүҥкэн суолталаахтар. Иникитин сылаас тохтобуллары барытын камеранан хааччыйар сорук турар.

«Кэтээн көрүү камератын «проблемнай» санитарнай туочукаларга туруорарга үлэлэһэбит (13 камера). Улахан массыыналар сүүүрдэн кэлэн хастыы эмэ куб бөҕү сүөкээн ааһар түгэннэрэ баар», - диир Евгений Григорьев.

Куорат пааркатыгар, Роман Дмитриев аатынан кытылга, нэһилиэнньэ мустар атын да уопсастыбаннай туоналарыгар 50-тан тахса камера баар.

Бу эйгэҕэ биир саҥа хайысханан 65 камераны холбуур, билигин холоон көрүү эрэсиимигэр эрэ үлэлиир ИТС (өйдөөх тырааныспар систиэмэтэ) буолар.

Уулусса-суол ситимин кыйа турар камералар ыарахан уйуктаах тиэхиньикэлэр көҥүллэммэт суолга киириилэрин, тентэ суох сылдьалларын эҥин хонтуруоллууллар.

Баһылык бэлиэтээбитинэн, кэтээн көрүү камераларынан хааччыйыы  нэһилиэнньэҕэ сэрэхтээх буолууну хааччыйар уонна уопсастыбаннай баайы-дуолу харыстыыр сыаллаах аныгы куорат ирдэбилэ.

Бу туһунан баһылык Евгений Григорьев бэйэтин тг-ханаалыгар үллэстэр.