Кэргэнэ декрет уоппускатыгар сылдьар кэмигэр эр киһи уоппускаҕа барыан сөп дуо?

Үлэ биэрээччи аккаастыыр бырааба суох, – диэн РФ Үлэҕэ министиэристибэтэ MAX платформаҕа баар ханаалыгар иһитиннэрэр.

Уоппусканы оҕо төрүөн иннинэ да, төрөөбүтүн да кэннэ оҥорторуохха сөп. Уоппуска графига уонна үлэ ыстааһа оруолу оонньообот. Күннэрин барытын эбэтэр сороҕун ылыахха сөп. Онуоха үлэ биэрээччигэ сайабылыанньа суруйуохха наада.

Манна даҕатан эттэххэ, кэлиҥҥи кэмҥэ эр дьон бэйэлэрэ декреккэ барар буолбуттар. Ол эбэтэр, оҕолонор уоппускаҕа барар хас биирдии сэттис төрөппүт эр киһи буолбут. Өскөтүн 2023 с.  маннык уоппусканы 30 тыһыынча эр киһи оҥорторбут буоллаҕына, 2025 с. бу көрдөрүү 226 тыһ. тиийбит.

Маннык көстүү төрүөтүнэн ыал аҕата ийэтээҕэр үрдүк хамнаска үлэлиирэ буолбут, диэн Социальнай пуонда чахчытыгар сигэнэн киин бэчээт суруйар.