Кэрэни саҕар, кэрэни кэрэһилиир саала

Саха Өрөспүүбүлүкэтин уус-уран ойууга-дьүһүҥҥэ бас түмэлэ алта филиаллаах. Биир үтүө күн Дьокуускайга Комдрагмет уораҕайыгар баар быыстапкалыыр сиргэ ыалдьыттаатым.

Методист Наталья Федорова үөрэ тоһуйда уонна үлэни-хамнаһы сырдатта:

– Быыстапкалыыр саала 2002 сылтан Киров уул., 12 турар Комдрагмет дьиэтин иккис этээһигэр үлэлиир. Икки экспозициялыыр саалалаахпыт. Бу саалаҕа аныгы кэм худуоһунньуктарын үлэлэрин туруорабыт. Быыстапкалар кэмиттэн кэмигэр уларыйаллар. Биһиги сүрүн сыалбытынан бастыҥ үлэлэри көрдөрүү, маастардары сырдатыы буолар. Быыстапканы ыл да туруорбаккын, үөрэтэн, саҥа сүүрээнин булан, көрөөччү болҕомтотун тардар уратытын быһааран, уонна оттон ускуустуба дьүһүйэр сыаннаһын көрөн талабыт. Экскурсиялары наука үлэһиттэрэ ыыталлар.

2025 сыл – үбүлүөйдэр сыллара. Онон элбэх быыстапка үлэлээтэ, үлэлиэҕэ даҕаны. Ол курдук, сыл саҥатыгар живописец, педагог, Саха сирин норуодунай худуоһунньуга, СӨ ускуустубатын үтүөлээх диэйэтэлэ, үлэ бэтэрээнэ Николай Иннокентьевка – «Живопись. Н. Иннокентьев. К 80-летию», кулун тутарга «Легенда» диэн Норуоттар икки ардыларынааҕы аныгы кэм живописецтарын быыстапката аһыллыбыттара. Манна Монголияттан кыттыбыттара. Хаһыат, араадьыйа, телевидение үлэһиттэрэ кыттыылаах пресс-конференция ыытыллан турар. Өрөгөйдөөх Кыайыы 80 сылынан «Великая Отечественная война: Герои/Антигерои» улахан хабааннаах быыстапка Саха сирин худуоһунньуктарын сойууһун кытта тэриллибитэ. Өйтөн-санааттан ааспат, арахпат сэрии тиэмэтэ билиҥҥэ диэри уруһуйданар, ыччат дьону тардар. Сонун, хартыына бэйэтэ тардар күүһүнэн толкуйданар быыстапкалары тэрийэргэ үлэлиибит. Холобур,  түмэл пуондатыттан уонна Худуоһунньуктар сойуустарын чилиэннэрэ кыттыылаах «Арктический пляж» диэн тэриллибитэ. Манна тиэхиньикэ уонна стиль араас көрүҥэ туһаныллыбыта. Болҕомтону тардар биир сүрүн быыстапкабытынан «Снайпер саха» буолар. Манна живопись, графика, скульптурнай үлэлэр туруоруллан, саха киһитин уобараһын көрдөрбүппүт. Аатырбыт снайпер И.Н. Кульбертинов, сэрии кыттыылаҕа Г.Д. Ефимов уо.д.а. хорсун-хоодут дьон  ыччат киэн туттар, холобур оҥостор дьоруойдара буолуохтаахтар.

Биһиги саалабыт норуот ускуустубатын тарҕатар миэстэнэн эмиэ буолар. Ол курдук, «Күндүүлэ» өбүгэ ииһин тарҕатар мастарыскыай үлэлиир. Мастарыскыайы маастар методист Варвара Заровняева үлэлэтэр. Варвара Ильинична талааннаах тарбахтарынан кэһиэччик, үтүлүк, халадаай уо.д.а. өбүгэ ииһэ маастар-кылаастар нөҥүө тигиллэллэр. Ким баҕалаах кэлэн оһуор кэрэ абылаҥынан иис-уус эйгэтигэр дьарыктаныан сөп. Биир интэриэһинэй дьарыкпытынан «Краски рассказывают» диэн ааттаах изостудия буолар. Дьарыктар хартыыналар ортолоругар, кинилэр алыптаах эйгэлэригэр ааһаллар. Дьарыгы методист Наталья Игоревна ыытар. Манна 6-12 саастаах оҕолор сылдьаллар. Ону таһынан доруобуйаларынан хааччахтаах оҕолорго «Солнечный круг» арт-терапияны ыытабыт. Уруһуй нөҥүө тулалыыр эйгэлиин алтыһыы, тарбахтары мускуйар лепка дьарыга, өҥ көмөтүнэн санааны этии, истиҥ сыһыан – барыта оҕолорго туһаайыллар. «Мостик» диэн И.Н. Егоров-Горнай аатынан мөлтөхтүк көрөр, көрбөт оҕолор өрөспүүбүлүкэтээҕи библиотекаларын кытта ситимнээхтик үлэлиир бырагыраамалаахпыт. Оҕолор төрөппүттэрин кытта бииргэ дьарыктаналлар, ол эрээри оҕо бэйэтэ оҥорон таһаарарыгар, истэригэр, кэпсииригэр болҕомто уурабыт.

Бу курдук сыл устата айымньылаахтык үлэлиир, сонун быыстапкалары таһынан дьикти дьарыктары ыытар саалаҕа сылдьыҥ, кэрэни кэрэхсээҥ. Үөрэх дьыла саҕаламмытынан баҕалаах оҕолору дьарыктар күүтэллэр.

Уруһуй – бу бэйэни сайыннарыы, тулалыыр эйгэни кырааска нөҥүө көрүү, бэйэ-бэйэҕэ истиҥ, сылаас сыһыан.