Кэрэ аҥаардарга болҕомто иһин Дьокуускайга төһөнү төлүүллэрий?

Дьокуускайга сибэкки дьөрбөтүн сыаната дойдубут атын куораттарыттан биллэ үрдүгүн бары да билэ олоробут. Бу бырааһынньыктан эрэ тутулуга суох, хас биирдии сибэкки маҕаһыыҥҥа атыыга кэлиэр диэри тыһыынчанан килэмиэтири айанныырыттан эмиэ тахсар.

Сибэкки салоннарыгар биир устуука роза сыаната быһа холоон 200-250 солкуобай.

Кулун тутар 8 күнүн саҕана тюльпаннар, гербералар, гвоздикалар уонна да атын биллэр сибэккилэр сыаналара тэҥ — үгэс буолбут күннэргэ хас биирдиилэрэ 200 солкуобайтан саҕаланар, оттон бырааһынньык иннинэ өссө ыарыыр.

Холобур, 35 классическай тюльпантан сибэкки дьөрбөтө 8 950 солк., ол аата хас биирдии сибэкки сыаната 255 солк. Оттон 35 пион быһыылаах тюльпан дьөрбөтө сыаната ыарыыр: 12 650 солкуобай (биир устууката 360 солкуобай).