Кэрэ аҥаардарга Алик Миллен сүбэлиир

Эбэтэр кинилэр визажист өҥөтүнэн туһаммакка сылдьаллар, эбэтэр бэйэлэрин таптаабаттар дииллэр. Оттон дьахтар кэрэтин саамай сыаналааччы, өрө тутааччы кимий? Биллэн турар – эр киһи! Ааһа баран – визажист эр киһи!

Аан дойдутааҕы дьахтар күнүн көрсө «Киин куораты» сөбүлээн ааҕар кэрэ аҥаардарга анаан Дьокуускай куоракка киэҥник биллэр визажист Алик Миллены кытта кэпсэттибит. Алик номнуо бэйэтин буочарын оҥостубут, суолун тэлбит талааннаах маастар буолан, киэргэппит, тупсарбыт кэрэ аҥаардарын көрбүт эрэ эндэппэккэ билэр.

– Алик, дьахтар аймаҕы өссө кэрэ оҥоруунан дьарыктаммытыҥ уонтан тахса сыл буолбут. Мөлтөх дьүһүннээх кэрэ аҥаар суох дииллэр, эн бу этиини кытта сөбүлэһэҕин дуо?

– Саамай сөпкө этэллэр. Бу сыллар тухары элбэх клиент кэлэн барда, эдэр да, кырдьаҕас да, ол тухары биир да куһаҕан дьүһүннээҕи көрө иликпин. Хас биирдии дьахтар, этэриҥ курдук, ааттыын кэрэ.

– Оччоҕо тоҕо визажистка кэлэллэр, эн сыалыҥ-соругуҥ тугуй?

– Визажист кинилэр кэрэ өрүттэрин ыйан, бэлиэтээн, чорботон биэрэн, бэйэлэрин таптыырга үөрэтэр. Нууччалыы эттэххэ, самооценкаларын үрдэтэр. Бастаан ону өйдөөбөттөр, көннөрү «харахпын улаатыннар, сирэйим наһаа төгүрүк, ону синньэт” эҥин диэбит курдук баҕа санаалаах кэлэллэр. Ону, холобур, үчүгэй, барыстаах өрүттэрин чорботон, бэлиэтээн биэрдэххинэ, наһаа үөрэллэр. Мин, дьиҥэр, пластическай хирург буолбатах буоллаҕым, көннөрү бэйэлэригэр баары кыраасканан, киистэнэн тупсаран эрэ биэрэбин. Ону өйдөөтөхтөрүнэ, бэйэлэрин дьүһүннэрин ылынан, ити этэр самооценкалара улаатар, бэйэлэрин таптыы үөрэнэллэр.

– Саамай аҕа саастаах клиеныҥ төһөлөөх этэй? Саастаах кэрэ аҥаардар бэрт сэмэй ирдэбиллээхтэрэ буолуо ээ.

– Дьэ суох! Саамай элбэх уонна үрдүк ирдэбиллээхтэр саастаахтар буоллаҕа. Миэхэ соторутааҕыта 93 саастаах кэрэ аҥаар сылдьыбыта. Хайдах, тугу оҥорторуохтааҕын чопчу билэр этэ. Ол оннугар эдэрдэр чопчу тугу баҕаралларын билбэттэр.

– Макияжка муода диэн баар дуо? Эдэрдэр муоданы, тренди эккирэтэр буолуохтаахтар.

– Муода диэбит курдук баар эрээри, эдэр өттө сүрүннээн чаҕылхай, этэргэ дылы, умайа, хаһыытыы сылдьар макияһы баҕараллар; оттон саастаахтар үксүн бэйэлэрэ эдэр эрдэхтэриттэн тутуһан кэлбит, “муус-маҥан сирэй, стрелка” эҥин диэбит курдук макияһы сакаастыыллар.

– Ол аата, эдэр эрдэҕинээҕилэрин курдук оҥорторон, эдэр көрүҥнэнээри гыналлар диэн дуо?

– Буолуон сөп.

– Оттон ити курдук саастарынан араардахха, эн тугу сүбэлиигин?

– Манна диэн эттэххэ, саастаах кэрэ аҥаардары кытта үлэлиир быдан үчүгэй. Тоҕо диэтэххэ кинилэр, эппитим курдук, тугу баҕаралларын чопчу билэллэр, саҥа уобарастарын тута ылыналлар. Оттон эдэрдэри улаханнык ыла сатаабаппын, этэргэ дылы, эдэр саастан ордук кэрэ суох да буоллаҕа.

– Алик, аҕыйах тылы бэйэҥ тускунан кэпсээ эрэ. Аан дойдуга дьахтар аймах баарын тухары кэрэ, өссө кэрэ буолууга дьулуһуу сүтүө суоҕа. Үйэлэргэ сүппэт, олус наадалаах идэни хаһан, хайдах талбыккыный?

– Мин Дьокуускай куоракка төрөөбүтүм, манна улааппытым. «Айыы Куо» диэн муода тыйаатыра диэни истибиккит буолуо. Онно дьарыктана сылдьан аан маҥнай визажист идэтин сэргии көрбүтүм. Бастаан балтыбар үөрэммитим. Дьиэҕэ олорон, кырааскалана-кырааскалана, төлөпүөнүгэр хаартыскаҕа түһэр идэлээҕэ, ол аайы мин үөрүүнэн макияж оҥорон иһэрим. Ити курдук сыыйа бу идэбэр кэлбитим.

– Күрэхтэргэ эҥин кыттаҕын дуу?

– Тоҕо онно кыттыахтаахпыный?

– Хайа, биллээри-көстөөрү, үөрэнээри.

– Биллиэхпин-көстүөхпүн баҕарбаппын. Онно кыттан эмоция ылыахха сөп буолуо эрээри, миэхэ наадалаах эмоцияны клиеннарым бэлэхтииллэр. Макияжпыт табылынна диэн үөрэллэриттэн-көтөллөрүттэн, махтаналларыттан ордук миэхэ туох да наадата суох. Оттон үөрэх чааһыгар бэйэм дьону үөрэтэр таһымҥа тахсыбыт киһибин.

– Чахчы даҕаны. Төһө да үлэҕин сөбүлээтэргин, сылайыы диэн баар дуу?

– Наһаа элбэх клиены ыла сатаабаппын, сөбүн көрөн үлэлиибин, арай бырааһынньыктарга эҥин аккаастыыр уустук. Хас биирдии кэрэ аҥаар ол күн кыраһыабай буолуон баҕарабын. Оннук күннэргэ сылайыы баар буолар. Ол үлэбиттэн буолбакка, биир үксүн эмоция өттүнэн. Тоҕо диэтэххэ клиеннаргын кытта хайдах кэпсэппэккэ, кэпсээннэрин сэҥээрбэккэ үлэлиэххиний?! Уонча сылы быһа миэхэ эрэ кэлэн оҥорторор клиеннардаахпын. Сорохтор кистэлэҥнэрин, олохторун бүтүннүү кэпсээн ааһаллар. Онон, визажист буоларым таһынан, психолог да буолан ылабын. Оннук күн, дьэ, уйулҕа өттүнэн сылайыы баар буолар. Саамай сүрүнэ, үөһээ эппитим курдук, астынан, дуоһуйан бараллара буоллаҕа! Бэйэм эмиэ кэрэни оҥорорбуттан дуоһуйабын.

– Сөп ээ. Дьахтар аймах оннук дьоммут. Этэргэ дылы, дьахтары уйар эрэ эр киһи маннык үлэни талар буолуохтаах. Дьэ эрэ, аны, бэйэбит дьиэҕэ оҥостуохпутун баҕарабыт. Кэллиэгэлэрбитигэр, эрдэрбитигэр, уулуссаҕа кыраһыабай буолан көстөөрү. Тугу сүбэлиигин?

– Оттон ол боростуой буоллаҕа. Cаамай сүрүнэ: хаас, уос, им.

– Чэ, уос, хаас өйдөнөр. Оттон румяна оннук наадалаах дуо?

– Биир саамай наадалаах. Аны туран, тональнай кириэми сатаан тутта үөрэниэххэ наада. Үгүстэр сарсыарда сыыһа-халты сирэйдэрин суунаат бистэллэрэ туох-баар сирэй оллурун-боллурун барытын көрдөрөр. Тональнай кириэм биир тэҥник сытарын туһугар тугу гыныахтааххытый?

– Ким билэр?

– Кириэмнэниэххэ наада. Тиис суунар курдук, күн аайы, сарсыарда аайы, сирэй суунаат, сүрэҕэлдьээбэккэ, бэйэҕит сирэйгит тириитигэр барсар сыворотка кэнниттэн халыҥнык увлажняющай кириэминэн бистэри үгэс оҥостуохха наада. Олох ритуал буолуохтаах. Оччоҕуна тональнай кириэм биир дэхси сытар уонна тириини сибиэһэй, сырдык, эдэр көрүҥнүүр. Эдэрдэргэ сүбэм диэн: арай сирэйгитигэр хатаал эҥин тахсыбыт буоллаҕына, чаҕылхай өҥнөөх помаданы талыҥ. Оччоҕуна болҕомто барыта сирэй тириитигэр буолбакка, уоска көһөр.

– Дьэ, Алик, махтал! Кэрэ аҥаардары бэйэлэрин таптыырга үөрэтэргэр, туһалаах сүбэлэргэр!