Кэнчээри ыччаты иитэр «Кэрэчээнэ» үбүлүөйдээх сылга анаммыт тэрээһиннэрэ

Хатастааҕы «Кэрэчээнэ» уһуйааныгар Улуу Кыайыы 80 сылын көрсө номнуо олунньу ыйтан араас тэрээһин буола турар. Ол курдук, олунньу 21 күнүгэр уһуйаан бөлөхтөрүн икки ардыларыгар строевой хаамыы күрэҕэ ыытыллыбыта.

Хатас үлэһит тэрилтэлэрин икки ардыларыгар «Хас биирдиибит өйдөбүлэ» куонкуруска уһуйааммыт үлэһиттэрэ 100% кыттыыны ылбыппыт. Муус устар 19 күнүгэр сарсыарда 10.00 чаастан бастакынан сыанаҕа тахсан, быыс арыллаатын кытта бары биир анал таҥас тиктэрэн, 4 эрээт тухары туран «День Победы» ырыаны ньиргиччи ыллаан саҕалаабыппытыгар, саалаҕа олорооччу дьон сүргэлэрэ көтөҕүллэн, сөҕүөхтэрин сөхпүттэрэ. Онтон литературнай монтажка араас идэлээх дьон (таҥас сууйааччы, иитээччилэр, иитээччи көмөлөһөөччүтэ, сэбиэдиссэй, суоппар, баһаарынай чаас байыастара, кухня үлэһитэ, психолог уо.д.а.) хоһоон ааҕан, ырыа ыллаан, үҥкүү толорон, көрөөччүлэр иһийэн, ааспыт сэрии ыар тыынын эттэринэн-хааннарынан иҥэринэ олороллоро харахха көстөрө.

«Кэрэчээнэ» уонна баһаарынай чаас эдэр эрчимнээх үлэһиттэрин толоруутугар кыайыы үөрүүтүн, тыынын биэрэр үҥкүүлэри уһуйаан дэгиттэр талааннаах музыкальнай салайааччыта Г.К. Ксенофонтова туруорбута. Дьэ уонна түмүккэ эбии үөрэхтээһиҥҥэ педагогпут В.Н. Старкова сценарийынан туруоруллубут толору көстүүлээх «Тиит мастыы туруулаһан» дьүһүйүүнү нэһилиэнньэ дьоно хас да күн уостан уоска кэпсээн оҥосто сырыттылар. Наталья Руфова «Сэрии кэмиттэн лоскуйдар» 6 кэпсээнин биир дьүһүйүүгэ таҥан туруоруу элбэх дьону уйадытта.

Хатас нэһилиэгин дьоно күргүөмүнэн «День Победы» ырыаны толорууларыгар «Кэрэчээнэ» кэлэктиибэ эйэ холууба тутуурдаах ыллааммыт, кэнчээри ыччат Улуу Кыайыыны ытыгылыырын бэлиэтээтибит.

Бу күннэргэ Улуу Кыайыы солбуллубат бэлиэтэ буолбут Кыайыы Знамята нэһилиэкпит устун айанныыр.

Кэлэктииппит саамай киэн туттар киһитэ, уһуйааммыт маҥнайгы сэбиэдиссэйэ тыыл бэтэрээнэ Анна Герасимовна Никифороваҕа хаһаайыстыбатыгар күүс-көмө буолабыт, аһынан-үөлүнэн көмө оҥоробут. Онон, бэйэтэ да этэринэн, саамай эрэнэр дьоно – үлэлээбит кэлэктиибэ ааттатабыт.

Ити курдук Улуу Кыайыы 80 сылын көрсө араас тэрээһиннэри «Кэрэчээнэ» уһуйаан биир сомоҕо буолан ыытар, тэрийсэр, холобур буолар.