Кэлим нолуок счета

ЕНС: дьиэ кэргэнинэн бары быһаарсыахтаахпыт

Арай эһиги кыбартыыраҕыт нолуогун төлөөбүккүт. Биир ыйынан нолуок уорганыттан сурук көтөн кэлэр – “Иэскитин төлөөҥ!” Баан сыһыарыытыгар киирэн көрдөххүтүнэ, суумаҕыт барбыт, ол эрэн нолуок төлөммөтөх. Оннук буолааччы?

Оннукка түбэһэ сылдьыбыт буоллахытына, ЕНС хайдах үлэлиирин билиэхтээххит. Кэлим нолуок счета 2023 сыллаахтан киирбитэ.

ЕНС туһунан судургутук

Урут хастыы да квитанциялаах буоларбыт – кыбартыырабытыгар, массыынабытыгар, сирбитигэр. Барытыгар тус-туспа, реквизиттэри тэҥнии-тэҥнии, нолуок төлүүр этибит.

Маны барытын билигин биир кумааһынньыктан төлүөххэ сөп – кэлим нолуок счетугар ыытаҕыт. Оттон нолуок сулууспата бэйэтэ аттаран биэрэр: сир, тырааныспар, баай-дуол, НДФЛ – барытын уочаратынан. Тус-туспа квитанциялары тэлибирэтэр, реквизиттэргэ буккуллар наадата суох.

Олус табыгастаах! Ол эрэн хас биирдии дьиэ кэргэҥҥэ сыһыаннаах уратылардаах.

Дьиэ кэргэн хас биирдии киһитэ туспа ЕНС-таах

ЕНС нүөмэрбит ИНН-мытыгар сыста сылдьар. Ыал ийэтигэр – туспа, аҕатыгар – туспа. Бэйэҕит нолуоккутун төлүүр буоллаххытына, бэйэҕит ИНН нүөмэргитин ыйаҕыт. Кэргэҥҥит киэнин төлүүргүтүгэр – кини ИНН. Оҕоҕо нолуок төлүүргэ эмиэ кини ИНН-на ыйыллар.

Буккуур туохха тахсыан сөбүй?

Холобур, төрөппүттэр 16 саастаах оҕолоругар суруллубут кыбартыыра нолуогун төлөөбүттэр. Бэйэлэрин ИНН-нарын ыйбыттар. Харчылара кинилэр ЕНС-тарыгар барбыт, уол иэһэ ыйанан хаалбыт. Эбэтэр кэргэнииллэр нолуоктарын барытын төлөөрү ийэ ИНН-нын ыйаллар. Ийэҕэ – нолуогар ордук төлөбүр киирэр, аҕаҕа – иэс ыйанан хаалар. Ол эрэн иккиэн “нолуокпутун барытын төлөөбүппүт” дии саныыллар...

Бутуллубат туһугар

Хас төлөбүр аайы ИНН бэрэбиэркэлээҥ. Бэйэҕит ИНН-нан бэйэҕит эрэ нолуоккутун төлөөҥ.

Нолуок төлөөччү тус кабинетыгар “Семейный доступ” диэни холбооҥ – оччоҕо оҕолоргут нолуоктара көстө сылдьарын тус аккауҥҥутуттан төлүүр кыахтанаҕыт.

Федеральнай нолуок сулууспатын саайтыгар эбэтэр мобильнай сыһыарыытыгар кыбаарталга биирдэ тус кабинеккытын киирэн көрөр буолуҥ – ЕНС балаансата көстө сылдьар. Эбэтэр “Уплата налогов и пошлин” сыаһарыынан туһаныаххытын сөп – система бэйэтэ сөптөөх реквизиттэринэн квитанциялары оҥорон биэрэр.

Сыыспыт буоллаххытына

Атын ЕНС-ка харчы ыыппыт буоллаххытына, нолуок уоргана ону бэйэҕит счеккутугар көһөрөр. Пени ааҕыллыбат.

***

Инникитин СӨ Үбү сөпкө туһаныыга сатабыл эрэгийиэннээҕи киинин исписэлиистэрин кытта өссө да атын тиэмэлэргэ кэпсэтиилэри таһааран иһиэхпит.