Кэлэр сыллааҕы уонна онтон кэлиэхтээх сыллар бүддьүөттэрин дьүүллэстилэр

Саха сирин 2027 сылга бүддьүөтүн дохуода 337,6 млрд солк., оттон ороскуот кээмэйэ 340,3 млрд солк. буолара сабаҕаланар. Ол эбэтэр 2,7 млрд диписииттээх бүддьүөт ылыллаары турар.

 2028 сыллааҕы дохуот – 375,8 млрд , ороскуот — 378,8 млрд солк. буолара сылыктанар. 2029 сылга тиийэн бүддьүөппүт –337,2 млрд, ороскуоппут  340,2 млрд солк. тэҥнэһэр чинчилээх. Ол эбэтэр 2028-2029 сыллардааҕы хааһына диписиитэ билиҥҥи суоттабылынан, 3 030 мөл. солк. буолуон сөп.

Бүддьүөт барылын бастакы ааҕыытыгар эһиил туох хайа ининэ хомунаалынай холбоһук тэрилтэлэригэр көрүллэр субсидия  кээмэйэ толору уонна бүддьүөт эйгэтин үлэһиттэрин хамнаһын пуондатыгар үбүлээһин ситэри-хотору киирбитэ этиллэр.

Бүддьүөт барыла, буоларын да курдук, Саха сирин социальнай-экэнэмиичэскэй сайдыытын, судаарыстыбаннай бырагыраамалары сабаҕалаан көрүүгэ тирэҕирэн уонна төһө-хачча дохуот киириэн сөптөөҕүн суоттаан туран оҥоһуллубут.  

Социалка, култуура эйгэтигэр эһиилги сылга уопсайа 151,3 млрд солк. былааннаммыт. Бу — бүддьүөт уопсай ороскуотун бүтүн 44,5 %-гар тэҥнэһэр эбит. Бу үпкэ-харчыта үөрэҕирии доруобуйа харыстабыла, социальнай бэлиитикэ курдук суолталаах салаалар, ону тэҥэ култуура, физическэй култуура, спорт уонна маассабай иһитиннэрии сириэстибэлэр үбүлэниилэрэ киирэр.  

Эһиил национальнай уонна федеральнай бырайыактарга 50 млрд солкуобай тыырыллара былааннаммыт. Итинтэн 38,2 млрд солкуобайа дойду бүддьүөтүттэн тыырыллыахтаах. Көрүллэр үбүлээһин дойду бэрэсидьиэнэ Владимип Путин анаан бэлиэтиир национальнай сыаллары толоророг туһуланыаҕа.

Уопсайа олохтоох бүддьүөттэн 311,5 млрд солк. суумалаах 27 судаарыстыбаннай бырагыраама үбүлэнэрин санаппыттар. Инвестициялаах бырагырааманы олоххо киллэрэргэ 39,9 млрд солк. былааннаммыт. Оттон олохтоох бүддьүөттэргэ ананар  бүддьүөт икки ардыларынааҕы трансферт кээмэйэ – 112,4 млрд солк.

Бүддьүөт барылын бүддьүөт ороскуота көдьүүстээхтик туттулларыгар толкуйдаммыт миэрэлэри туһаныыны учуоттаан оҥорбуттар. Итинник дьаһаныы судаарыстыбаннай бырагыраамалары сиһилии, ымпыгар-чымпыгар диэри толкуйдаан сөптөөхтүк үбүлүүргэ уонна судаарыстыба өйөбүлүн туһаныы көдьүүһүн сыаналыырга туһуланар.