«Кэлэр кэм дипломата» сүүрбэһис төгүлүн ыытыллар

Быйылгы үбүлүөйдээх күрэх түмүктүүр түһүмэҕэ кулун тутар 30 күнүттэн муус устар 1 күнүгэр диэри А.Г. уонна Н.К. Чиряевтар ааттарынан Дьокуускай куораттааҕы национальнай гимназияҕа ыытыллар.

Сүүрбэһис төгүлүн тэриллэр күрэх быһаарыылаах түһүмэҕэр 54 үөрэнээччи кыттар. Онтон 36-та – 9-11 кылаастар, 18 кыттааччы – орто сүһүөх оҕото (5-8 кылаастар).

Быйылгы күрэх эрэгийиэн икки ардыларынааҕы таһымнаах: Калужскай уобаластан, Удмуртия уонна Башкортостан Өрөспүүбүлүкэлэриттэн 11 үөрэнээччи – «Дипломаты будущего» Бүтүн Арассыыйатааҕы оҕо уопсастыбаннай хамсааһынын бэрэстэбиитэллэрэ ВКС нөҥүө быһа холбонон, эсселэрин көмүскүөхтэрэ. Ол түмүгүнэн кинилэргэ туспа анал аат олохтонуоҕа.

Бэлиэтээн эттэххэ, «Кэлэр кэм дипломата» күрэх үс түһүмэхтээх: оскуола, муниципальнай уонна өрөспүүбүлүкэтээҕи. Бастаан 2007 сыллаахха тэриллэригэр 9-11 кылаас үөрэнээччилэригэр аналлаах этэ. 2017 сылтан 7-8 кылаастар кыттар буолбуттара.  Онтон 2022 сылтан төрөппүттэр уонна учууталлар көрдөһүүлэринэн 5-6 кылаастары аччыгый лигаҕа киллэрбиттэрэ.

Тэрийээччилэр – СӨ Тас сибээскэ уонна норуоттар дьыалаларыгар министиэристибэтэ, СӨ Үөрэххэ уонна билимҥэ министиэристибэтэ, Дьокуускай куоракка Арассыыйа Федерациятын Атын дойдулардааҕы министиэристибэтин бэрэстэбиитэлистибэтэ, «Юные якутяне» өрөспүүбүлүкэтээҕи ресурснай киин, Дьокуускай куорат Үөрэххэ управлениета, «Дипломаты будущего» Бүтүн Арассыыйатааҕы оҕо уопсастыбаннай хамсааһына, «Северный форум» норуоттар икки ардыларынааҕы НПО, норуоттар икки ардыларынааҕы ыччат бииргэ үлэлэһиитинэн дьарыктанар «Интерсфера» тэрилтэ.