Кэлэр 2027 сылга биэнсийэни иккитэ индексациялыахтара

Туһааннаах сокуон барыла оҥоһуллан, дойду бырабыыталыстыбатын көрүүтүгэр киирбит.

✅Бастакы индексация олунньу 1 күнүгэр билиҥҥи дьиҥ баар инфляцияҕа тирэҕирэн, 6,8% буолуоҕа диэн торумнаммыт.

✅Иккиһэ 3,3 %- наах индексация — муус устар 1 күнүгэр. Биэнсийэҕэ төһө солк. эбиллэрэ киһи аайы тус-туһунан буолар. Өрүү да буоларын курдук, биэнсийэ ыстааһын ааҕан таһаарыыттан ол тутулуктаах.

Страховой биэнсийэ, ортотунан, 2,6 тыһ. солк. эбиллиэ диэбиттэр. Оччотугар биэнсийэ орто кээмэйэ эһиил 29,9 тыһ. солк. тэҥнэһиэ үһү.

Үчүгэйэ, үлэлии сылдьааччылар биэнсийэлэрэ эмиэ итинник индексацияланар.

Ону таһынан, олоҕурбут үгэһинэн, үлэлии сылдьааччыларга атырдьах ыйынааҕы эбии ааҕыы киириэҕэ. Кыра да буоллар – эбиллии. 3 баалтан эбиллибэт быраабылалаах.

✅Биэнсийэттэн ураты атын, тииһинэн олоруу алын кээмэйэ төһө буоларыттан тутулуктанар босуобуйалар уонна төлөбүрдэр эһиил, тохсунньу 1 күнүттэн, эмиэ 6,8% үрдүөхтэрэ.

ЕДВ-ны, Ийэ хапытаалын уонна оҕо төрөөтөҕүнэ бэриллэр босуобуйаны олунньу 1 күнүттэн дьиҥ баар инфляцияны учуоттаан үрдэтиэхтэрэ.

Оттон социальнай биэнсийэни — муус устар 1 күнүттэн. Ол чуолкай кээпписийиэнэ быһаарылла илик. Биэнсийэлээххэ 2026 с. бигэргэммит тииһинэн олоруу алын кээмэйин учуоттаан быһаарыахтара.