Кэбээйилэр Олоҥхо ыһыаҕар күүскэ бэлэмнэнэллэр

Өрөспүүбүлүкэ 19 улууһуттан мустубут дьоҥҥо бу тэрээһин билиилэрин хаҥатар, уопут атастаһар, төрүт үгэстэри харыстыыр, көлүөнэттэн көлүөнэҕэ тиэрдэр, ыһыаҕы үрдүк таһымҥа ыытарга төһүү күүс буолар аналлаах былаһаакка.

Быйылгы Олоҥхо ыһыаҕа промышленнай баайын, булдун-алдын таһынан, аҕыйах ахсааннаах эбээн норуотуттан саҕалаан, араас омук биир иллээх дьиэ кэргэн буолан олорор Кэбээйи оройуонугар Арассыыйаҕа биллэриллибит Норуоттар сомоҕолоһууларын сылыгар ыытыллар буолбута ураты суолталаах.

Ол курдук, конференция иитинэн Платон Ламутскай аатынан Сэбээн Күөл орто оскуолатын оҕолоро «Ньургун Боотур» олоҥхону Дмитрий Кривошапкин тылбааһыгар эбээннии толоруулара, туруоруу эбээннии һээдьэнэн түмүктэммитэ сылдьыбыт, көрбүт-истибит эрэ кэрэхсэбилин ылыан ылла. Тэрээһиҥҥэ сылдьыбыт култуура миниистирэ Афанасий Ноев бу туһунан: “Оҕолор эбээннии холкутук саҥараллара үөртэ. Бу буоллаҕа – төрөөбүт тыл кэскилэ. Маныаха оскуола, төрөппүттэр, уһуйаан төрүт үгэскэ, тылга-өскө, култуураҕа сыһыаран, тапталы иҥэрэн, сөптөөх үлэни ыыталлара олус хайҕабыллаах! Үлэҕит таһаарылаах буоллун!» – диэбитэ элбэҕи этэр.

Киэҥ сэҥээриини "Олоҥхо дойдутун устун айан" бэстибээл ылла. Ол курдук, Гаврил Менкяров режиссердаах Олоҥхо тыйаатырын "Дьорҕостой Бэргэн" куукуланан олоҥхото, олоҥхонон оонньуулар уонна оонньуурдар – балыктыырга үөрэтэр мас оонньуурдар, саахымат, хабылык, хаамыска, ойбонтон уулааһын, "Муҥха" оонньуу, эридьиэстээх таабырыннар о.д.а. – ордук оҕо аймах сэҥээриитин ыллылар.

П.Д. Степанов аатынан Кэбээйитээҕи кыраайы үөрэтэр түмэлгэ ыһыах алгыһын сиэригэр-туомугар туттуллар сэлэни уонна сулары оҥорууга маастар-кылаас буолла. 8-9, 10-11 кылаас үөрэнээччилэрэ хас да секциянан арахсан Кэбээйигэ үүнэр эмтээх оту-маһы, Олоҥхо дьоруойдарын, төрүччүлэрин, кыраайдарыгар баар түмэллэри хабан, сахалыы оонньуулары айан оҥорбуттарын дакылаат оҥорон кэпсээтилэр.

Санатар буоллахха, XVI «Ысыах Олонхо в Кобяйском улусе: хранители традиции, озёрная культура, творческие индустрии» өрөспүүбүлүкэтээҕи научнай-методическай конференция түмүгүнэн Олоҥхо III Уон сылын былаана торумнаныаҕа, муниципалитеттар таһымнарыгар фольклору, илиинэн оҥоһугу, төрүт тылы харыстааһыны кэтээн көрүү критерийдэрэ бигэргэниэҕэ.