Кэбээйи Олоҥхо ыһыаҕар бэлэмнэнэр

Онон уочараттаах ХIХ Олоҥхо ыһыаҕа эһиил, 2026 сыл от ыйын 4-5 күннэригэр, кэрэ кэскил кыраайыгар Кэбээйигэ буолаары турар.

Кэбээйилэр бу үрдүк чиэһинэн сибээстээн бэлэмнэнии үлэтин саҕалаабыттара быданнаата. Ол чэрчитинэн ахсынньы 8 күнүгэр Дьокуускай куоракка Өксөкүлээх Өлөксөй аатынан Норуот айымньытын дьиэтигэр «Кэбээйилэр ыллыыллар» киэҥ далааһыннаах тэрээһини ыыттылар.

Бу күн улуус киэн туттар артыыстара, композитордара, норуодунай артыыс Алексей Калининскай-Луҥха Өлөксөйө, Степан Васильев, Николай Спиридонов, «Этигэн хомус» музыкальнай бириэмийэ биэс төгүллээх хаһаайына Сахая, Опера уонна балет тыйаатырын, «Туймаада» судаарыстыбаннай ырыа амнсаамбылын, Эстрада тыйаатырын көмүс куоластаахтара Мария Шапошникова, Айталина Спиридонова, Константин Степанов, Терентий Егоров, Святослав Эверстов, виртуоз-баянист Виктор Дабайаан о.д.а. кыттыылаах кэнсиэр сааланы олору мустубут көрөөччүлээх буолан ааста.

Кэнсиэр кэмигэр норуот маастардара, талба талааннаахтара быһахчыт Мукучу Унаар, иистэнньэҥ Аграфена Петрова, ювелир Наталья Намыын, о.д.а. оҥоһуктарынан, ону сэргэ аатырар Ньидьили эбэ соботунан аукцион тэрилиннэ, баҕалаахтар аһымал пуонда дьааһыгын нөҥүө үбүлээһиҥҥэ көмөлөстүлэр. Онон кэбээйилэр бастакы Олоҥхо ыһыахтарыгар ох курдук оҥостон эрэллэр.

Манна даҕатан эттэххэ, Олоҥхо ыһыахтара 2006 сылтан үтүө үгэскэ кубулуйан ыытыллаллар. 2022 сылтан Ил Дархан ыйааҕынан сыл аайы сэттэ олоҥхоһукка сэтинньи 25 күнүгэр Олоҥхо күнүгэр судаарыстыбаннай истипиэндьийэ туттарыллар. Истипиэндьийэ кээмэйэ 30 тыһыынча солкуобай уонна анаммыта кэлэр ыйыттан биир төгүрүк сыл устата бэриллэр.