«Катюша» флешмоб Катюшалары күүтэр

Онон сибээстээн бу аахсыйаны Дьокуускай куоракка тэрийэр Екатерина Костроминаҕа тахсан, сиһилии ыйыталастыбыт:

– «100 Катюша Катюшаны ыллыыр» флешмоб — Кыайыы күнүгэр анаммыт истиҥ уонна патриотическай аахсыйа. Бүгүҥҥү күҥҥэ Москва, Санкт-Петербург, Самара, Тюмень, Новосибирскай о.д.а. куораттар кыттарга бэлэмнэрин биллэрбиттэр.

Муус устар 26 күнүгэр флешмобка бастакынан Красноярскай куорат кыттан, 102 Екатерина «Катюша» ырыаны толорбута.

Мин бу аахсыйа туһунан социальнай ситимнэртэн билбитим уонна тутатына интэриниэт киэҥ куйаарыгар ыҥырыы бырахпытым. Икки суукка иһигэр 150-тан тахса Екатерина кыттарга баҕатын биллэрбитэ. Онон ыам ыйын 1 күнүгэр Кыайыы болуоссатыгар «Катюшаны» ыллыахпыт. Идея ааптара Константин Алексеев бэйэтэ Дьокуускайга кэлэн биһиэхэ кыттыһыаҕа. Биһиги кэннибититтэн эстафетаны ыам ыйын 2 күнүгэр Москва салҕыаҕа. Ити курдук салҕанан иһиэҕэ.

Аахсыйа түмүктэннэҕинэ, тэрийээччилэр киинэ оҥорон таһаарар былааннаахтар. Красноярскай Катюшаларыттан маны таһынан ыарыһах оҕолорго эмкэ харчы хомуйарга этии киирбит этэ. Оттон биһиги бу Бүтүн Арассыыйатааҕы патриотическай аахсыйаҕа дьоһуннук кыттыахпыт диэн эрэнэбит.

Санатар буоллахха, блогер Константин Алексеев көҕүлээһинэн Арассыыйа үрдүнэн аатырбыт «Катюша» ырыанан флешмоб ыытылла турар. Сыала – Екатерина (Катя) диэн ааттаах кэрэ аҥаардар мустан, Кыайыы күнүн көрсө күргүөмүнэн «Катюша» ырыаны ыллыыллар. Ол курдук, холобура, Красноярскай куоракка номнуо Сибэтиэй Параскева Пятница чочуобунатын таһыгар 102 Екатерина мустан, 40-с сыллардааҕылыы таҥнан, «Катюша» ырыаны толорбуттар. Аахсыйаҕа Москва, Санкт-Петербург, Самара, Новороссийск, Новосибирск куораттары сэргэ Дьокуускай эмиэ кыттыһарын биллэрбитэ. Дьокуускай куорат графикка ыам ыйын 1 күнүгэр турарын биллэрэллэр. Аахсыйаҕа кыттыан баҕалаахтар @nutellkatya тг-ханаалга тахсыаххытын сөп.