Кангалааска дьиэ ууга барда, уоту араардылар

Бу туһунан Кангалаас дьоҕус оройуонун баһылыга Виктория Жилина «Эхо столицы» таһаарыыга кэпсээтэ.

«Биһиэхэ үс ОДьКХ эбийиэгэ уу ылар сиригэр турар – ууну ыраастыыр тутуу, водозабор, канализация ыстаансыйата уонна тоҕус чааһынай олорор дьиэ.

Билигин биир дьиэ ууга барда, биэс дьиэҕэ анньан турар. Уу түстэҕинэ, иһигэр киирбитин-киирбэтэҕин көрүөхпүт», – диэтэ Жилина.

Кангалааска халаантан эмсэҕэлээбиттэри быстах кэмҥэ олордор пуун бэлэм, ол эрээри уу ылар зонатыгар олорор дьон аймахтарыгар барбыттар. Ууга барбыт дьиэ олохтооҕо эмиэ сиэнигэр көспүт.

«Нэһилиэнньэҕэ сэрэтии үлэтэ ыытыллыбыта, дьиэлэринэн сылдьыбыппыт. Карл Маркс уонна Набережнай уулуссаларга уот ситимэ куттал суох буолуутун хааччыйар сыалтан араарыллыбыта.

Түүн «ЯПАК» оптуобуһа дьуһуурустубалыы кэлбитэ. Уу таһыма өссө үрдээтэҕинэ, Тулагы диэкинэн тахсыан сөп, оччоҕуна пассажирдары иккис оптуобус куорат диэкиттэн көрсөн ылыаҕа. Уопсайынан, биһиэхэ сыл аайы кэриэтэ маннык быһыы-майгы буолар, ол эрээри быйыл уу биллэ элбэх», – диэн тоһоҕолоон бэлиэтээтэ Виктория Жилина.