Кангалааска бөх уматар оһох тутуллуон сөп

Бөх тиэйэр массыына өҥөтө Дьокуускайга чааска аччаабыта 3000 солк. Барыллаан ааҕыы да көрдөрөрүнэн, балайда ороскуоттаах өҥө. Маннык кыһалҕаны Маҕан, Тулагы, Хатас, Табаҕа бөһүөлэктэрэ бары көрсөллөрө чахчы.

Оттон арай Кангалааска бэйэтигэр бөх уматар оһоҕу туруорай хайдаҕый? Маннык этии баһылык Дмитрий Садовников нэһилиэктэр дьаһалталарын баһылыктарын кытта көрсүһүүтүгэр иһилиннэ.

Оттон Кангалаас кыһалҕата итинэн эрэ муҥурдаммат. Манна ыраас уу да кэмчи, суотабай сибээс да мөлтөх, спорт саалата да суох. Биир уустук боппуруоһунан эргэ дьиэлэри көтүрүү буолар – спорт саалатын, остолобуой, овощехранилище, баһаарынай чаас урукку дьиэлэрэ дьаһаллыбакка тураллар. Бөһүөлэк бу уонна атын тыын кыһалҕаларын Виктория Жилини куорат баһылыгын кытта көрсүһүүгэ бэлиэтээн турар.