Кабачок бэристилэр дуо?

Кабачоктан салҕабыт, соччо сэргээбэппит да буоллар, кинитэ суох үгүс кыһыҥҥыга хаһаанар аспыт оҥоһуллубат эбээт. Өссө ханнык сонун бүлүүдэлэри оҥоруохха сөбүй?

БАРЫАННЬА

- 2 кг ыраастаныллыбыт кабачок;

- 2 устуука апельсин;

- 1 устуука лимон;

- 2 кг саахар.

Кабачогу кыра кээмэйдээх кубиктарга кырбыыбыт, сиэмэтин ыраастыыбыт. 

Апельсин хаҕын бытархай гына кырбыыбыт, уоннааҕытын туһаммаппыт, аһыы амтан биэриэҕэ. Лимону хаҕылаан, кыра гына кырбыыбыт.

Барытын биир миискэҕэ кутабыт, саахарбытын эмиэ. 6 чаас курдук туруорабыт, кабачокпут уута тахсан, саахарбыт ууллуохтаах. Ол кэннэ 1,5 чаас кэриҥэ мөлтөх уокка туруоран оргутабыт.

Сөрүүн сиргэ харайабыт.

БӨРҮӨК

• 1 кабачок;
• 1 сымыыт;
• 100 г сыыр;
• 200 г бурдук;
•  50 г ынах арыыта;
• 100 мл үүт;
• 1 ч.нь. разрыхлитель;
• туус, күөх тума;
• мас арыыта.

Кабачокпутун сууйабыт, куурдабыт. Хахтаабакка түөркэлиибит. Сыыры эмиэ түөркэлиибит. Бурдугу сиидэлиибит, тууһуубут, разрыхлитель эбэн булкуйабыт.

Бурдукпутун сыыры уонна кабачогу кытта холбуубут, кичэйэн мэһийэбит.

Ынах арыытын уулларабыт.

Сымыыты, үүтү, ууллубут арыыны холбуубут, тууһуубут.

Бурдуктаах уонна үүттээх аспытын холбуубут.

Арыынан оҕунуохтаммыт формаҕа кутан 200 кыраадыска 40 мүнүүтэ духуопкаҕа буһарабыт.

Мультиваркаҕа оҥоһуллар кабачок икрата

Мультиваркаҕа кабачок икрата эмиэ бэрт судургутук оҥоһуллар.

• Кабачок – 3 уст. орто;
• Эриэппэ луук – 2 уст.;
• Моркуоп – 2 уст.;
• Оҕурсу – 2 уст.;
• Помидор – 3 уст.;
• Чочунаах  3 өлүүтэ;
• Туус, хара мэлии биэрэс, укуруоп (ким төһө сөбүлүүрүнэн).

Мультиваркабытын “тушение” диэҥҥэ туруорабыт. Диетическайдык аһыыр буоллаххытына, мас арыытын куппаккыт. Буспутун кэннэ барытын блендэрдээн кэбиһэбит. Бэртээхэй икра бэлэм.

Олус түргэн уонна минньигэс бүлүүдэ 

• Кабачок – 400 г;
• Сүөгэй – 80 г;
• Кытаанах сыыр – 85 г;
• Туус, укуруоп;
• 1 өлүүскэ чеснок.

Кабачоктары 1-1,5 см гына төгүрүктүү кырбаан баран туустуубут, сыырдаах буоларын учуоттаан аһара аһыы гыммаппыт.

Туспа миискэҕэ сүөгэйгэ кыра гына кырбастаммыт эбэтэр преһинэн ыгыллыбыт чеснокпутун эбэбит, укуруоппутун кутабыт.

Сыырбытын түөркэлиибит.

Духуопка лииһигэр кабачоктарбытын тэлгэтэбит, сүөгэй соуспутунан биһэбит, үрдүгэр түөркэлэммит  сыырбытын кутабыт. 

Духуопкаҕа 180 кыраадыска 20 мүнүүтэ буһарабыт.

Майонезтаах икра

• Кабачок  – 3 кг;
• Чочунаах – 10 өлүүтэ;
• Саахар – 100 г;
• Туус – 1 ост. ньуоска;
• Майонез – 250 г;
• Томат паастата – 250 г;
• Лимон сүмэһинэ – 1 ост. нь. аҥаара;
• Мас арыыта – быһа холоон 150 мл;
• 2 ост. ньуоска 70%-наах уксус;
•  Күөх тума (ким тугу, төһөнү баҕарарынан).

Помидору үчүгэйдик сууйуллар уонна итии уунан саба кутуллар. Оччоҕуна сиппит-хоппут помидор чэпчэкитик хахтанар. Помидору тута блендергэ мэһийэбит. 

Састааппытыгар баар аһы барытын улахан иһиккэ ким хайдах сөбүлүүрүнэн кырбаан 20 мүнүүтэ орто уокка оргутан ылабыт. 

Оргуйбутун кэннэ кыратык сойута түһэн бараммыт блендергэ мэһийтэрэбит.

Иэдьэгэйдээх кабачок

• 2 кабачок;
• 200 г иэдьэгэй;
• 1 сүүмэх укроп уонна петрушка;
• 2 өлүүскэ чеснок;
• 1 сымыыт;
• Туус, тума, хара биэрэс;
• 100 г сыыр.

Кабачоктарбытын хахтыыбыт, устатынан быһабыт. Иһин хостуубут.

Иэдьэгэйи, күөх тумабытын, ньыһыллыбыт чесногу, сымыыты бииргэ холбуубут. Туустуубут, тумалыыбыт.

Кабачоктарбытын начыынныыбыт.  Үрдүгэр сыыр таммалатабыт.

180°С духуопкаҕа  40 мүнүүтэ буһарабыт.