Каартанан эбэтэр QR-куодунан төлүүр туох уратылааҕый?

Бу туһунан Арассыыйа Үпкэ министиэристибэтин Үп научнай-чинчийэр институтун «Моифинансы.рф» бырайыагын эксперэ Николай Дмитриев сиһилии кэпсиир.

QR-куодунан төлүүргэ баан каартата ирдэммэт. Баан сыһыарыыта эбэтэр каартаны терминалга уурбакка төлүүр сыһыарыы (СБПэй уонна да атыттар) ити куод иһигэр кистэммит иһитиннэриини ааҕаллар, онон төлөбүрү каартата да суох оҥоруохха сөп. QR-куод уруһуйугар элбэх иһитиннэрии кистэнэр эбит – ханнык өҥө/ табаар иһин, ханнык бааҥҥа, счекка, төһө сууманы төлүөххэ наадатын, кимиэхэ тиийэрин туһунан. Ити куод чыпчылыйыах иннинэ арыллар (англ.тылтан Quick Response түргэн хардарыы диэн тылбаастанар). Төлөбүр оҥорорго төлөпүөҥҥэ баар сыһыарыы нөҥүө аахтарыах уонна төлөбүрү бигэргэтиэх эрэ тустааххын. Онон бүтэр. Ол эрээри төлөбүр бу ньымата каартаны толору солбуйбат, көннөрү альтернатива эрэ буолар. Төлөпүөн иитиитэ бүтэр түгэнигэр эбэтэр туох эрэ кэккэ төрүөтүнэн QR-куоду арыйар кыах суох буолуон сөп, оннук түгэҥҥэ каарта хаһан баҕарар ордук.

Атыылаһааччыга ханнык түгэҥҥэ барыстааҕый?

QR-куодунан төлүүр түргэн уонна табыгастаах, ол эрээри баан кэшбегэ эбэтэр баал сороҕор ааҕыллыбат буолуон эмиэ сөп. Төлөбүр бу көрүҥүн баан бырагыраамата соччо биһирээбэт, ордук быраабынан туһанар кыаҕы биэрбэт эбит буоллаҕына, сорох маҕаһыыннарга QR-куодунан төлөөтөххө чэпчэтии көрүллэр (ол туһунан төлүөх иннинэ каассаҕа этэллэр эбэтэр интэриниэт-маҕаһыын саайтыгар таһаараллар).

Ону таһынан СБП-тан кэшбек, аахсыйанан чэпчэтии ылыахха сөп. Ол сотору-сотору МИР национальнай төлөбүр систиэмэтин кытта ыытыллар (программа лояльности - https://privetmir.ru). Баҕарар буоллахха СБП аахсыйатынан манньа ылыахха сөп, онуоха өйдөөн көрөөрүҥ эрэ, куод уруһуйун ортотугар СБП логотиба баар буолуохтаах.

Өссө атын барыстаах өрүттэрэ:

— QR-куодунан төлөөбүт буоллахха, табаары төннөрөр түгэҥҥэ харчы быдан түргэнник киирэр. 

— реквизитинэн төлүүргэ (холобур, уһуйаан, үөрэх, ОДьКХ өҥөлөрүн, нолуогу, ыстараабы уонна да атыны) уһун да уһун куодтары, элбэх да элбэх сыыппараны (холобур, КБК, тус счет уо.д.а.) сыыһа баттыам диэн куттаммаккын. QR-куодунан төлөбүр көмүс тэҥэ күндү бириэмэбитин да, харчыбытын да харыстыыр (баан каассатыгар расчетнай кииҥҥэ тиийэн төлүүр буоллахха, быдан үрдүк хамыыһыйаны тутуохтарын сөп).

Тугу билиэхтээхпитий? 

Пластик каартаны кытта тэҥнээтэххэ, QR-куодунан төлүүр арыый куттала суох, тоҕо диэтэххэ онлайн төлөбүргэ каарта дааннайын уонна кэннигэр баар кистэлэҥ сыыппараларын суруйар ирдэммэт, атыннык эттэххэ, каарта дааннайдарын уорар кыахтара суох. Ол да буоллар түөкүттэр атын угаайыларыгар киирэн биэрэр куттал баар – хара санаалаах дьон дьиҥнээх QR-куоду уларытыахтарын сөп. Ол эрээри оннук түгэҥҥэ атыылаһааччыттан син биир төлөбүр сууматын эрэ уһулаллар, баан дааннайдарын уорар, хайдах да счетуттан харчытын барытын суйдаан ылар кыахтара суох. Манна бэрт судургу быраабыланы тутуһуҥ: бэрэбиэркэни ааспыт онлайн-маҕаһыынтан/интэриниэт-былаһааккаттан атыылаһар ордук, тугу да туспа-туора сигэнэн киирэн төлөөмөҥ, төлөпүөҥҥүтүгэр вирустан харыстыыр бырагырааманы туруортарар эрэллээх.   

Дьокуускай куорат Олохтоох дьаһалтатын Үпкэ департаменын иһитиннэриитэ