"Каадырдар" нацбырайыак чэрчитинэн Саха сирин олохтоохторо үөрэниэхтэрин сөп

"Дьарыктаах буолууга көмөлөһөр көхтөөх миэрэлэр" федеральнай тосхол чэрчитинэн үлэлээн саҕалаабыт "Каадырдар" национальнай бырайыагынан тустаах араҥаҕа киирсэр гражданнары үөрэтии тэрээһинэ олоххо киирэр. Үөрэниэхтэрин сөп: 50 уонна онтон үөһээ саастаахтар, биэнсийэҕэ тахсыан иннинээҕи саастаах дьон, 3 сааһыгар диэри оҕолорун көрөн уоппускаҕа олорор дьон, оскуолаҕа киириэн иннинээҕи саастаах үлэтэ суох ийэлэр, инбэлииттэр, 35-гэр диэри саастаах ыччат, үлэтэ суох гражданнар, СВО кыттыылаахтара уонна дьиэ кэргэттэрэ, дьарыктаах буолуу киинигэр үлэ көрдөөн тиийбиттэр.
Үөрэтиини федеральнай бүддьүөт суотугар маннык үөрэх тэрилтэлэрэ ыыталлар:
"Томскайдааҕы судаарыстыбаннай национальнай чинчийэр университет", "РФ Бэрэсидьиэнин иһинэн норуот хаһаайыстыбатын уонна судаарыстыбаннай сулууспа  Арассыыйатааҕы академията", "Профессиональнай үөрэхтээһини сайыннарыы института", РФ үлэҕэ уонна социальнай көмүскэлгэ  "Бүтүн Арассыыйатааҕы научнай-чинчийэр үлэ института".
Үөрэҕи тэрийии Арассыыйатааҕы үлэ ырыынагар ирдэнэр идэлэр, дуоһунастар испииһэктэригэр олоҕурар (360 профессия).
Бүгүҥҥү күҥҥэ өрөспүүбүлүкэ олохтоохторо "Работа в России" порталга "Каадырдар" нацбырайыагынан үөрэнэллэригэр Томскайдааҕы судаарыстыбаннай университет "Экскурсовод (гид)", "Эколог предприятия", "Обеспечение информационнай безопасности", "1 С разроботчик" тэйиччиттэн үөрэнэр бырагыраамалара киллэриллэн тураллар.
Бу порталга нацбырайыак чэрчитинэн үөрэтэр бырагыраамалар күннэтэ эбиллэллэр.
Мунаарар боппуруостаахтар сиһилии профессиональнай үөрэхтээһини тэрийии салаатыгар (4112) 507804 нүөмэргэ эрийэн билсиэххитин сөп диэн СӨ Нэһилиэнньэ дьарыктаах буолуутугар судаарыстыбаннай кэмитиэтэ иһитиннэрэр.