Күһүҥҥү тыллар

Тускутугар туһаныҥ, күннээҕи кэпсэтиигитигэр хото киллэриҥ, тылгыт саппааһын хаҥатыҥ.

Добдурҕа, аат. Күһүн кыстык хаар түһүөн иннинэ сир добдугурас буола тоҥуута, оннук тоҥоруу кэмэ.

Дьогдьоот, даҕ. Хойукка диэри хаара суох, сир халтаҥынан туран тоҥор кураан, тымныы (күһүнэ).

Кугдарый, т. Кубарыйа саһар (хол., күн уотуттан эбэтэр хаһыҥтан).

Нуһараҥ, аат. Күһүн, саас хаардаах чуумпу, сылаас күн, оннук күн-дьыл.

Саппах, аат. Халлааны, күн уотун сабан мөлтөтөр, өлбөөрдөр чараас былыт.

Сиппэрэҥ, аат. Ордук күһүн суол-иис, сир наһаа илийэр хаардаах, самыырдаах күнэ (кэмэ).

Хаһыҥ, аат. Күһүөрү сайын түһэр түүҥҥү тымныы, тоҥоруу.