Күүтүүлээх тэрээһиммит бу нэдиэлэ бүтүүтэ буолар

Куорат олохтоохторугар, ыалдьыттарыгар уонна оҥорон таһаарааччыларга күүтүүлээх тэрээһин балаҕан ыйын 27 күнүгэр диэри Хомсомуол болуоссатыгар ыытыллыаҕа.

Быыстапка-дьаарбаҥкаҕа олохтоох оҥорон таһаарааччылар, бааһынай хаһаайыстыбалар, ону тэҥэ өрөспүүбүлүкэ араас муннуктарыттан агро хайысхалаах оскуолалар кыттыыны ылыахтара.

Тыа хаһаайыстыбатын министиэристибэтэ иһитиннэрэринэн, быйылгы тэрээһин бырагыраамата киэҥ буолуоҕа: Арктикатааҕы судаарыстыбаннай агротехнологическай университекка сэминээр, стратегическай сиэссийэ, «Дириэктэр» диэн сахалыы киинэ сүрэхтэниитэ, АПК үлэһиттэрин кэнсиэрэ, «Тыа сирин күүһэ» өрөспүүбүлүкэтээҕи бизнес-форум, үүнээйини олордууга, сүөһүнү иитиигэ, ас-үөл бырамыысыланнаһыгар анаммыт күрэхтэр. «Үрдүк хаачыстыбалаах ас бородууксуйатын оҥорон таһаарыы иһин» күрэскэ бастыҥнар быһаарыллыахтара, ону тэҥэ өрөспүүбүлүкэ агрооскуолаларын ортолоругар күрэхтэр ыытыллыахтара.

Субуотаҕа, балаҕан ыйын 26 күнүгэр, АГАТУ ипподромугар үгэс буолбут ат сүүрдүүтэ буолуоҕа.

«Ас-үөл» быыстапка-дьаарбаҥка – Саха сиригэр тыа хаһаайыстыбатын уонна ас-үөл бырамыысыланнаһын сайыннарыыга анаммыт бөдөҥ тэрээһин. Дьаарбаҥкаҕа кыттарга дьоҕус уонна орто урбаан субъектара ыҥырыллаллар.