Күүстэрэ – түмсүүгэ, кыахтара – сомоҕолоһууга

И.И. Захаров аатынан Хатастааҕы оҕо спортивнай оскуолата саҥа уораҕайга киириэҕиттэн үлэһитин ахсаана элбээн, хабар эйгэтэ биир оччонон кэҥээн, айымньылаах аартык аана аһылынна.

Ол курдук кэлэктиип урут уонча киһилээх эбит буоллаҕына, күн бүгүн 40-тан тахса киһи таһаарыылаахтык, үтүө түмүктэрдээх үлэлиир-хамсыыр. Ол туһугар атын-атын хайысхаларынан үтүө түмүккэ тиийэр, нэһилиэнньэ интэриэһин тардар араас ньыманы тутталлар. Бүгүн олортон биирдэстэрин сырдатыам.

О.э. бүгүн, олунньу 17 күнүгэр, «Захаров ФЕСТ”  диэн ааттаах тэрээһиҥҥэ Дьокуускай куорат спортивнай оскуолалара түмсэннэр, И.И. Захаров туһунан сиһилии билистилэр.

Доруобуйаларынан хаарчахтаах оҕолору кытта үлэлиир тренердэр иһитиннэриилэрин сэргээтилэр, сүбэ-ама ыллылар. Инклюзивнай үөрэхтээһиҥҥэ ирдэбил оскуола аайы баар буолан, бу түһүмэх интэриэһи балачча тарта. Бастаан Василий Васильевич Аргунов уопсай билиһиннэриитин кэнниттэн исписэлиистэр кэпсээтилэр. Манна, этэргэ дылы, ууну-уоту ортотунан ааһан, урут суох көрүҥҥэ (адаптивнай спорка) үрдүк көрдөрүүлэри ситиспит СӨ үтүөлээх тренерэ Константин Дмитриевич Гаврильев уонна кини биир идэлээхтэрэ Аркадий Валерьевич Степанов, Элеонора Андреевна Устинова үлэлэрин уратыларын билиһиннэрдилэр.

Уйулҕа үөрэхтээхтэр кэлэн тренердэри кытта араас түгэннэргэ хайдах үлэлэһиэххэ сөбүн ырытыстылар. Түһүмэх сүрдээх көхтөөхтүк ааста, ырытыһыы, санаа атастаһыыта, токоолоһон туран быһаарыы баар буолла. Мин санаабар, элбэх мунаах түгэннэргэ көмө буолла.

Көрүҥнэринэн арахсаннар маастар-кылаастары ыыттылар уонна саҥа ньымалары, албастары атастастылар. Бу түһүмэх ордук тустуу, мас тардыһыы көрүҥнэригэр харах уоттаах, сүрэх өрүкүйүүлээх ааста.

И.И. Захаров аатынан Хатастааҕы оҕо спортивнай оскуолатын кэлэктиибэ тэрийбит лотереятыгар кыттаннар өттүк харалаах, илии тутуурдаах бардылар. Кылаан бирииһи – СВЧ оһоҕу Хатастан Айлан Николаев сүүйэн үөрүү өрөгөйүн биллэ. Ыалдьыттар даҕаны кураанах барбытылар – тоҥ балыктан саҕалаан сир аһыгар, буспут диэн, тоҥ диэн, кэнсиэрбэлэммит диэн балыкка тиийэ сүүйдүлэр.

Маны таһынан саха дьонун сиэринэн чэйдэттилэр.
Тэрээһиҥҥэ кыттыбыт дьон бары үлэлэригэр анаммыт тус көмөнү ааһан, биир эйгэҕэ үлэлиир дьоннорун кытта күрэххэ, күөн көрсүһүүгэ буолбакка, ыксаабакка-тиэтэйбэккэ сэһэргэһэн, сүбэ-соргу бэрсэн, күлэн-оонньоон, түмсүүлээх-сомоҕолоһуулаах буолуу тыыныгар киирдилэр.

Бу туһунан Тулагы 8 №-дээх оҕо спортивнай оскуолатыттан кэлэ сылдьар Адель Николаевна Мир санаатын үллэһиннэ:

– Бэртээхэй уонна олус наадалаах тэрээһин буолла. Тэрийээччилэр бу күнү бары өттүттэн көрөн үрдүк таһымҥа ыыттылар. Дьиэлэрэ-уоттара ырааһа, сылааһа, дьоно-сэргэтэ эйэҕэһэ наһаа үчүгэй. Кэлэктиипкэ ил-эйэ, бииргэ буолуу тыына киириэххиттэн биллэр. Оттон тэрээһини сыалын-соругун ситтэ дии саныыбын. Үлэ-хамнас ньымаларыгар, албастарыгар туһуламмыт буолан, көмөтө элбэх буолла. Дьиҥэ, барытын билэр курдук эрээри, этэргэ дылы, кинигэҕэ суруллара – биир, онтон олоххо атын буоллаҕа. Онон маннык сүбэ-ама ылар олох үчүгэй дии саныыбын.

Сардаана Николаевна Константинова:

– Бу тэрээһини тэрийсибит дьонтон биирдэстэрэ буоларым быһыытынан айбыт-туппут үлэбит этэҥҥэ ааспытыттан ис сүрэхпиттэн үөрэн олоробун. Сыалбытын-сорукпутун ситтибит дии саныыбыт. Аан бастакы буолан буолуо, кэллиэгэлэрбит кэлиилэрэ наһаа маассабай буолбата. Ол гынан кэлбит дьонтон ким даҕаны кэмсиммэтэ, төттөрүтүн, үөрэн-көтөн, махтанан, бары сертификаттаах, уопут атастаһыы туһунан туоһу суруктаах бардылар. Бу эмиэ үлэҕэ наһаа наадалаах түгэн буоларын билэбит. Маннык тэрээһиннэр кэлэктииби түмэр, сомоҕолуур күүстээхтэр.

Дьэ, кырдьыга да оннук. Анатолий Михайлович Баишев салайааччылаах И.И. Захаров аатынан Хатастааҕы оҕо спортивнай оскуолатын кэлэктиибэ биир ыал курдук ил-эйэ тыыннаах. Бу тэрээһин иннигэр сүрдээх элбэх бэлэмнэнии үлэтэ баран, сабыс-саҥа истиэндэлэр оҥоһуллубуттар, суунуу-тарааныы, хомунуу-иминии, сааһыланыы буолбут. Бу күн кэлэктиип 100 бырыһыан кэлэн, бары анал түһүмэхтэринэн эппиэтинэстээхтик үлэлээтилэр-хамсаатылар.
 
Түмүккэ дьэ, кырдьыга даҕаны, норуот муудараһа этэринии, И.И. Захаров аатынан Хатастааҕы оҕо спортивнай оскуолатын  күүһэ – түмсүүгэ, кыаҕа – сомоҕолоһууга диэн санааҕа кэлэҕин.