23.02.2024 | 16:00

Күүстээх аҥаардарбытын тото аһатабыт

Биллэн турар, эр дьон, ордук саха дьоно, эт аһылыгы ордороллор. Кинилэргэ анаан эттэн, кууруссаттан уонна хартаттан наһаа минньигэс бүлүүдэлэри астаан үөрдүөҕүҥ.
Күүстээх аҥаардарбытын тото аһатабыт
Ааптар: Киин Куорат
Бөлөххө киир

Эттээх рулет

Састааба:

Кытаанах сыыр – 200 г;

Сымыыт – 3 устуука;

 Мааннай куруппа – 3 ост. ньуоска;

Майонез – 100-150 г.

Начыына:

Эриллибит эт – 500 г;

Сымыыт – 2 устуука;

Эриэппэ луук – 1 устуука;

Туус, биэрэс.

Сыырбытын бөдөҥ гына түөркэлиибит, сымыыты, мааннай куруппаны уонна майонеһы кытта булкуйабыт. Духуопка лииһигэр тэнитэ уурабыт уонна 180С кыраадыска 20 мүнүүтэ буһарабыт.

Буһа турдаҕына начыынын бэлэмниибит: эриллибит эккэ эриэппэ луугу, 2 сымыыты, тууһу, туманы эбэн булкуйабыт. 20 мүнүүтэнэн сыырдаах аспытын хостоон кыратык сойута түһэбит, онтон үрдүгэр начыыммытын тэнитэн уурабыт. Сэрэнэн рулет быһыылаан суулуубут. Эмиэ 180С кыраадыстаах духуопкаҕа 40 мүнүүтэҕэ уган буһарабыт.

Соркуойдаммыт куурусса

Састааба:

500 г куурусса түөһүн этэ;

2 ост. ньуоска мас арыыта;

1 орто эриэппэ луук;

Чочунаах 4 өлүүскэтэ;

1-2 минньигэс биэрэс;

1-2 ост. ньуоска бальзамическай уксуус (виннай);

2-3 ост. ньуоска соевай соус;

1 ост. ньуоска саахар.

Кууруссабыт түөһүн синньигэс гынан, эбэтэр куубуктуу кырбастыыбыт. 1-2 минньигэс биэрэһи соломолуу быһабыт, биэрэһи түөркэлэммит моркуобунан солбуйуохха сөп.

Хобордоохпутугар 1 ост. ньуоска мас арыытыгар кууруссабыт түөһүн саһарчы ыһаарылыы түһэбит, хостуубут. Итиннэ өссө 1 ост. ньуоска мас арыытын эбэбит уонна кырбастаммыт луукпутун, чочунаахпытын сырдьыгынатан ылабыт, онтон соломолуу быспыт биэрэспитин эбэтэр түөркэлэммит моркуоппутун кутан, биир-икки мүнүүтэ буһарабыт. Салгыы бальзамическай уксуус (виннай) уонна саахар эбэбит, мүнүүтэ курдук булкуйа-булкуйа буһара түһэбит. Ити кэнниттэн кууруссабыт түөһүн төттөрү хобордооххо угабыт, хаппахтыыбыт уонна мөлтөх уокка 20 мүнүүтэ буһарабыт.

Хартаттан салаат

Састааба:

Харта – 350 г;

1 эриэппэ луук – 1 устуука;

Сибиэһэй оҕурсу – 1 устуука;

Помидор – 1 устуука;

Күөх луук – ким төһө сөбүлүүрүнэн;

Мас арыыта – 1 остолобуой ньуоска (эбиэххэ сөп).

Саха киһитэ сөбүлүүр аһыттан биирдэстэрэ – харта. Итинтэн сахалыы салаат наһаа минньигэс уонна тотоойу буолар.

Хартаны соломолуу, луугу, оҕурсуну, помидору кубиктыы кырбыыбыт.

Барытын холбуубут, мас арыытынан тумалыыбыт, күөх луук таммалатабыт. Наһаа минньигэс салаат бэлэм!

Кууруссалаах уонна тэллэйдээх салаат

Састааба:

Куурусса түөһэ – 400 г;

Черри помидор – 250 г;

Сыыр – 200 г;

Шампиньон – 250 г;

Майонез, туус.

Куурусса түөһүн ууга буһарабыт, сойутабыт. Шампиньоннары сууйабыт, кыра соҕус гынан кырбастыыбыт, кыратык мас арыылаан соркуойдуу түһэбит, сойутабыт.

Кууруссабыт түөһүн кыра соҕус гына, сыырбытын куубуктуу, помидору чиэппэрдии бысталыыбыт. Барытын салаат оҥорор миискэбитигэр кутабыт. Майонезтыыбыт, туустуубут, булкуйабыт.

Банааннаах торт

Бу саамай судургутук оҥоһуллар торт, тоҕо диэтэххэ буһарар наадата суох. Солото суох эбэтэр сүрэҕэлдьиир буоллахха, наһаа үчүгэй.

Састааба:

Бэчиэнньэ –  340 г;

Банаан – 3 устуука;

Сүөгэй – 400 г;

Саахар – 150 г;

Желатин – 25 г;

Уу – 125 г.

Бу торду оҥорорго ханнык баҕарар бэчиэнньэ барсар – минньигэс крекер, овсянай, песочнай уо.д.а. Банаан арыый кытаанаҕа ордук. Сүөгэй бырыһыана ханныгыттан тутулуга суох, ким хайдаҕы сөбүлүүрүнэн.

Желатины инструкциятыгар сурулла сылдьарынан оҥоробут.

Бэчиэнньэни улахан миискэҕэ илиибитинэн бытарытабыт, ол эрэн наһаа мэлии гыммаппыт, куһуоктарынан сылдьара ордук.

Банааны хаҕыттан ыраастаан баран орто кээмэйдээх куһуоктарга бысталыыбыт.

Бэчиэнньэлээх миискэбитигэр кырбастаммыт банааны кутабыт.

Аны сүөгэйинэн кириэм оҥоробут: сүөгэйи саахары кытта булкуйабыт, саахара ууллуор диэри аҕыйах мүнүүтэ венчигинэн  эбэтэр миксеринэн ытыйабыт. Ытыйарбытын тохтоппокко итии желатины сэрэнэн кутабыт. Биир мүнүүтэ курдук өссө ытыйабыт.

Кириэммитин бэчиэнньэлээх уонна банааннаах миискэбитигэр кутабыт уонна ньуосканан булкуйабыт.

Састаабы пуормаҕа кутабыт, дэхсилиибит уонна пленканан бүрүйэбит. Холодильникка уган кырата биир чаас туруорабыт, хоннорор өссө ордук. Сарсыныгар тоҥмут торду пуорматтан хостуубут, пленкатын устабыт.  Араас фруктанан, отонунан эбэтэр сакалаатынан киэргэтиэххэ сөп.

Сонуннар

Ордук ааҕаллар

Саха сирин саамай эдэр хапытаана - Дүпсүнтэн сыдьааннаах!
Дьон | 04.04.2024 | 09:00
Саха сирин саамай эдэр хапытаана - Дүпсүнтэн сыдьааннаах!
Өрүскэ, муораҕа, акыйааҥҥа да буоллун, араас идэ барыта баар, ол эрээри саамай биллэр уонна ааттаах-суоллаах – биллэн турар, хапытаан. Кинилэр хорсун сырыыларын, бэйэлэригэр эрэллээхтэрин, ыраах айаннарын туһунан төһөлөөх элбэхтэ аахпыппыт, киинэҕэ көрбүппүт буолуой.
Тустууга уларыйыылары күүтэллэр
Дьон | 30.03.2024 | 12:00
Тустууга уларыйыылары күүтэллэр
Хаһыаппыт бүгүҥҥү ыалдьыта – ССРС көҥүл тустууга аан дойду кылаастаах бүтэһик спорт маастара, Улуу Коркин сүмэлээх сүбэтин истибит, Таилиҥҥа тиийэ тренердээбит Михаил Протопопов. Михаил  Егорович «Киин куорат» хаһыат ааҕааччыларын кытта уһуйуллубут тренердэрин, көбүөргэ умнуллубат киирсиилэрин туһунан, тустууну сайыннарыыга тус көрүүлэрин үллэстэр.   – Михаил Егорович, үтүө күнүнэн! ССРС саҕана тыа сирин...
«Эн эмиҥ аттыгар үүнэр...»
Дьон | 30.03.2024 | 10:00
«Эн эмиҥ аттыгар үүнэр...»
Светлана Ивановна Попова – Нам улууһун Хатырык нэһилиэгин олохтооҕо, түөрт оҕо иһирэх ийэтэ, элбэх сиэн эйэҕэс эбэтэ. Кини Максим Аммосов төрөппүт кыыһа Лена Аммосованы, эдьиийэ Наталья Кировна кыыһа Мария Охлопкованы кытта өр сыллаах истиҥ сыһыаннарын сэһэргээтэ. 80-гар чугаһаабыт ытык кырдьаҕастан Саха сирин эмтээх үүнээйилэрин хомуйар ураты дьарыгын эмиэ туоһуластыбыт, ааҕааччыларбытыгар...
Зоя Желобцова:  «Олох толору үөрүүтүн, кэрэтин билэн сылдьабын»
Дьон | 11.04.2024 | 10:00
Зоя Желобцова: «Олох толору үөрүүтүн, кэрэтин билэн сылдьабын»
«Үчүгэй киһи» диэн хайдах киһини ааттыылларый? Арааһа, бастатан туран, дьоҥҥо эйэҕэс, аламаҕай, үөрэ-көтө сылдьар, барыга-бары кыһамньылаах, үлэһит киһини ааттыыр буолуохтаахтар. Дьэ, оччотугар, биһиги дьүөгэбит Зоя Константиновна Желобцова онуоха сүүс бырыһыан эппиэттэһэр. Киһи киһитэ буоллаҕа биһиги Зоябыт!   Оттон киһи барахсан мутугунан быраҕар муҥур үйэтигэр дьонугар-сэргэтигэр, ыччаттарыгар хайдах суолу-ииһи, ааты, өйдөбүлү хаалларара...