Көс дьиэ үлэһитэ идэлээхтэр болдьоҕу иннинэ биэнсийэлэнэллэрин туруорсаллар

Таба иитиитигэр, чуумҥа үлэлэһэр көс олохтоох дьахталлар болдьоҕу иннинэ ананар хотугу биэнсийэҕэ страховой ыстаастарыттан тутулуга суох тахсар бырааптаналларын курдук оҥоһуллубут сокуон барыла Госдуума көрүүтүгэр киирбит. Маннык көҕүлээһини Ненец автономнай уокуругун дьокутааттара киллэрбиттэр.

Сокуон барыла эбии быһаарыы суруктаах эбит. Онно РФ Үлэ министиэристибэтин бирикээһинэн 2025 сыл балаҕан ыйын 1 күнүттэн көс дьиэ үлэһитэ (работник кочевого жилища) диэн саҥа идэ баар буолбута, ол түмүгэр дьахталлар үгэс оҥостубут төрүт дьарыктарыгар сокуоннайдык үлэҕэ киирэр кыахтаммыттара көҕүлээһини киллэрэргэ төһүү буолбута этиллэр. Салгыы: “Көс олохтоох дьахталлар үгүс өттүгэр үлэһит быһыытынан билиниллибэттэрэ, онон аныаха диэри ыстаастара ханна да суруллубат этэ уонна судаарыстыба көрөр өйөбүлүн туһанар кыахтара суоҕа, социальнай биэнсийэҕэ эрэ суоттанарга тиийэллэр. Көс олохтоох дьахталлар саастарын тухары уустук усулуобуйаҕа ыарахан үлэни толорон баран, онтулара ыстааска ааҕыллыбат этэ”, – диэн быһаарбыттар.

Итини этэн туран, табаһыттары, балыксыттары уонна промысловик-булчуттары сэргэ көс дьиэ үлэһитэ идэлээхтэр эмиэ биэнсийэҕэ болдьоҕу иннинэ тахсар бырааптаналларын курдук дойду “Страховой биэнсийэ туһунан” сокуонугар уларытыы киллэрэри туруорсубуттар.