Күргүөм ырыа көдьүүстээх күүһэ, ылбаҕай ырыа ыралаах ыллыга

Быйылгы дьыл Хатас нэһилиэгэр олорор дьоҥҥо өйгө-санааҕа хаалар элбэх үтүө күннэрдээх – нэһилиэкпит 380 сыла, Улуу Кыайыы 80 сыла, учуутал Самсоновтар ааттарынан Хатас орто оскуолатын 110 сыла, Хатас библиотекатын өр сылларга салайбыт ССРС култууратын туйгуна, РФ уонна СӨ култууратын үтүөлээх үлэһитэ, 1941-45 сс. Аҕа дойду Улуу сэриитин кыттыылааҕа  Панаев И.Д. 100 сыла уо.д.а. 

Хатас дьоно барахсаттар урут даҕаны, билигин даҕаны биир сомоҕо, түмсүүлээх буолан, күннэтэ үүнүү, сайдыы суолун тэлэллэр...

Ол да иһин буолуо болдьоммут чааска, этиллибит кэмҥэ сыыйа-баайа анал көстүүмнэрдээх, сахалыы таҥастаах, араас элбэх атрибуттаах – плакаттаах, мэтириэттээх, былаахтардаах уо.д.а. дьон-сэргэ муһунна. «Тускул» КК кэлэктиибэ кэлэн аппаратура туруоран музыка холбоотун кытта, сонно тута хайдах эрэ барыта орун-оннугар түстэ, сүргэ көтөҕүлүннэ, ыллыах-туойуох, хамсаныах-имсэниэх санаа өссө күүскэ киирдэ.

Мустубут төрүөппүт – эйэлээх олоҕу чугаһатар туһугар тыыннарын толук уурбут, хааннаах кыргыһыы хонуутугар охтубут аҕа көлүөнэҕэ сүгүрүйүүбүтүн биллэрэн, Давид Тухманов музыкатыгар «Кыайыы күнэ» ырыаны 500 тахса буолан толоруубут буолла. Улуу музыкант олус табыллыбыт дьүрүскэнэ уус-уран тыл ыҥырар, умсугутар эйгэтин кэҥэтэн, дириҥэтэн биэриитин сүрэхтиин-дууһалыын толору ылынан, бэл диэтэр, тыынардыын биир тэтимҥэ киирэн, бииргэ буолартан бигэ тирэхтэннибит, кытта буолартан кыаҕырдыбыт. Дьэ манна буолла кэккэлэһэ турар киһиҥ кэрэтийиитэ, сэргэстэһэ турар киһиҥ сэргээһинэ, манна буолла ырыа дьайар күүһүн таба туһаныы.

Күргүөм ырыа бырайыага нэһилиэк дьаһалтатын баһылыга Пермяков Евгений Петрович тэрилтэлэр салайааччыларын кытта уочараттаах сүбэ мунньаҕар хас биирдии тэрилтэ түмэр-сомоҕолуур сыаллаах-соруктаах, иитэр-үөрэтэр суолталаах дьыаланы оҥоруохтаах, кимиэхэ туох этиилээҕий диэн көҕүлээһиниттэн төрөөбүтэ. Ол мунньах чэрчитинэн нэһилиэкпит тэрилтэлэрин икки ардыгар бэстибээл ыытылынна, Рейхстакка анньыллыбыт  Кыайыы Знамятын куоппуйатын эстафетата, «Голос памяти», «Слово памяти», «Память каждого»  уо.д.а. атын ааттаах үгүс элбэх тэрээһин буолла.

Күргүөм ырыа туһунан этиини Хатастааҕы оҕо ускуустубатын оскуолатын дириэктэрэ Лемешева Христина Николаевна бэйэтин кэлэктиибин кытта сүбэлэһэн баран киллэрбитэ. Бырайыак сэргээһини, кэрэхсээһини ылан, бары көмөлөөн, өйөһөн, өйдөһөн үлэлээһин түмүгэр табылынна, сүргэни көтөхтө, сүрэҕи өрүкүттэ. Манна тэрилтэлэрбит салайааччылара Чепалов В.А., Слепцов Н.В., Баишев А.М., Брусенина Е.С., Николаева Г.С., Пинигин А.С., Стручкова С.Т., Ылахов П.И., Неустроев С.И., түөлбэлэр салайааччылара Попов Н.С., Андросов Н.М., Никифорова Т.В., Ефимова А.П., Мокрощупова А.С., Осипов А.Д. суолта биэрэн, бириэмэ булан күүскэ үлэлэспиттэрин түмүгэр бу улахан хор таҕыста.