Көрдөрүү атахтанара кыһыылаах

Ол курдук, судаарыстыбаннай былаас отчуотугар сигэннэххэ, 8 бөдөҥ спорт эбийиэгэ үлэҕэ киирэн, спорт оскуолаларын, саалаларын базалара саҥардыллан, чахчы, киһи эрэ үөрэ истэр усулуобуйата тэриллэр.

Ити ааттанар 8 бөдөҥ эбийиэктэринэн Ньурба Антоновкатыгар спорт саалата, Дьокуускай Жатайыгар бассейн, Аллараа Бэстээххэ бассейннаах спорт комплекса, Горнай Бэрдьигэстээҕэр элбэх функциялаах спорт саалата, Уус Алдан Мындаабатыгар спорт комплекса, Бороҕоҥҥо элбэх функциялаах комплекс, Дьокуускайга сабыылаах каток, Бүлүү Кыһыл Сыырыгар спорт саалата буолаллар. ГТО комплексын туттарар кииннэргэ 37 былаһаакка тэриллибит, «Дохсуҥҥа» футбол хонуута тэлгэммит, Олимпийскай эрэл училищетыгар физкультурнай-чэдбдигирдэр комплекс оҥоһуллубут.

Өрөспүүбүлүкэбитигэр бу курдук тутуулар үлэҕэ киирэллэрэ нэһилиэнньэ физическэй култуураҕа уонна спорка интэриэһин, көҕүн кэҥэтэллэрэ саарбаҕа суох. Ону Ил Дархан Айсен Николаев Ил Түмэҥҥэ Анал этиитигэр ааспыт биэс сыл устата спордунан уонна физическэй култууранан дьарыктанааччы ахсаана балтараа төгүл элбээтэ диэн бэлиэтээбитэ арылхайдык туоһулуур.

Ол курдук, статистика чахчытынан, Саха сирин үрдүнэн бүгүҥҥү күҥҥэ 2309 спорт эбийиэгэ үлэлииир, ол иһигэр: 888 спорт саалата, 657 аһаҕас халлаан анныгар былаһаакка, 54 бассейн, 32 ытар тир, 25 стадион, 22 хайыһар базата, 9 сабыылаах каток, 622 спорт эбийиэгэ уо.д.а.үлэлиир.

Бу дьоһун чахчылары арай быйыл кыһыны быһа салҕаммыт «Дохсун» спорткомплексын хомунаалынай кыһалҕалара, «Триумф» салалтатын иирсээнэ, улуустарга ГТО дастабырыанньатын атыылааһын курдук мөкү хартыыналар хараардаллар. Ити үлүгэр үчүгэй көрдөрүү атахтанара кыһыылаах даҕаны.