Көҕөрдүү үлэтигэр анаммыт I наука-практика кэмпириэнсийэтэ буолла

Дьокуускай куорат уокуруктааҕы дьаһалтатыгар “Дьокуускай куорат ландшафнай архитектурата уонна дизайна. Кыһалҕалар уонна быһаарыылар” диэн тиэмэлээх аан бастакытын ыытыллар “Сайын-2026” наука-практика кэмпириэнсийэтэ буолла.  Мунньах Дьокуускай төрүттэммитэ 400 сылын туолар бэлиэ сылыгар бэлэмнэнии чэрчитинэн ыытыллар.

Сугулаан кыттыылаахтарыгар уонна ыалдьыттарыгар анаан саадка, оҕуруокка туттуллар тэрил, инвентарь уонна ландшафнай архитектураҕа сыһыаннаах литэрэтиирэ быыстапката  тэриллибит. Пленарнай мунньахха мээр сүбэһитэ Екатерина Павлова модератордаата. Куорат баһылыга Евгений Григорьев тэрээһин кыттыылаахтарын эҕэрдэлээтэ уонна өрөспүүбүлүкэбит килбэйэр киин куоратын ландшафнай архитектуратыгар сыһыаннаах кыһалҕалары, баар итэҕэһи уонна ону көннөрөргө туох этиилэр, хайысхалар баалларын аһаҕастык дьүүллэһэргэ ыҥырда.

«Кэнники үс сылга биһиги сүҥкэннээх үлэни ыыттыбыт. Бастатан туран, наука сообществотын кытта биһиги килиимэппит уратытыгар барсар куораты көҕөрдүү стандартын таҥан таһаардыбыт. Онно олоҕуран нуорма-быраап аакталара уларыйыахтара. Бу уларыйыылар куораты көҕөрдүүгэ ирдэбиллэри киллэриэҕэ», – диир Евгений Григорьев.

Мэр солбуйааччыта Владислав Слепцов кэмпириэнсийэ тутулун билиһиннэрдэ: «Биһиэхэ наука сообществотын бэрэстэбиитэллэрэ, ботаническай саадтар үлэһиттэрэ, АГАТУ устудьуоннара, көҕөрдүү үлэтигэр ыкса сыһыаннаах биисинэстээх дьон, уопсайа 100-тэн тахса кыттааччылаах, бастакытын ыытыллар наука-практика кэмпириэнсийэтэ бу саҕаланна.  Тэрээһин икки күн устата буолар. Бүгүн – теория: кэпсэтии, сүбэлэһии, санаа атастаһыыта. Оттон иккис күнүгэр —  практическай чааһа. Ол аата, маһы сөпкө олордорго, маска буортуну аҕалбакка эрэ эрбииргэ үөрэтэр маастар-кылаастар буолуохтара. Кэмпириэнсийэ түмүгүнэн резолюция ылыллыа».

Наука-практика кэмпириэнсийэтигэр 15 киһи дакылаат бэлэмнээн кэлбит. Кинилэр ортолоругар СӨ Ил Дарханын иһинэн үлэлиир Архитектура уонна куораты тутуу Управлениетын салайааччыта, СӨ кылаабынай архитектора Любовь Папок, СӨ Урбааҥҥа уонна атыыга уонна туризмҥа миниистирин солбуйааччы Мария Карпова, Дьокуускай уокуруктааҕы дьаһалтатын Куораты тутууга уонна архитектураҕа Департеманенын салайааччыта Семен  Сергеев уо.д.а. бааллар.  

Бу туһунан Дьокуускай уокуруктааҕы дьаһалтатын  пресс-сулууспата иһитиннэрэр.