Көҕөрдүү үлэтэ исписэлиистэр илиилэригэр киирбитэ номнуо билиннэ

Куорат баһылыга Евгений Григорьев бэйэтин телеграм-ханаалыгар Кыайыы болуоссатыгар ааспыт эрэ нэдиэлэҕэ ыһыллыбыт газон ото номнуо бытыгыраан эрэрин үөрэ үллэстэр.
«Быйыл манна ууну автоматическайдык кутуу ньыматын оҥордубут. Онон газон үчүгэйдик ылсарыгар эрэнэбит. Болуоссаты кытта сэргэстэһэ сытар Роман Дмитриев аатынан кытылга эмиэ быйыл көҕөрдүү үлэтин ыыттыбыт, газон ыһан, номнуо иккитэ оҕустулар», -- диэн суруйар баһылык.
Санатар буоллахха, Кыайыы 80 сылынан киин куоракка Кыайыы болуоссатыгар быйыл көҕөрдүү үлэтэ аныгылыы көрүүнэн тэриллэн эрэр. Ол эбэтэр көҕөрдүү үлэтинэн анал үөрэхтээх дьон дьарыктаналлар. 
Бу иннинэ баһылык бэлиэтээбитинэн, Хабаров уулуссатын кыйа аны күһүн манна 15 устуука сэдэхтик көстөр күөх уонна 18 устуука көннөрү харыйа мас олордуллуоҕа. «Газону ыһыынан уонна олордуу мастарынан быйыл бэдэрээттээх тэрилтэ дьарыктаныаҕа. Кэнэҕэһин Губинскай уокурук управата бэйэтэ бэдэрээтчити наймылаһан үлэлэтиэҕэ. Тоҕо диэтэххэ маннык үлэнэн идэтийбит дьон эрэ дьарыктанар кыахтаах», – диэн быһааран турар куорат баһылыгын көҕөрдүү үлэтигэр сүбэһитэ Екатерина Павлова. 
От ыйын эргэтигэр хастыы даҕаны клумбаны үлэлэтэр кыахтаах мотуордары, клумбалары сиигирдэр фонтаннары саҥардыы таҥа сылдьар буоллахтарына, уонча эрэ хонугунан газон номнуо бытыгыраан эрэрэ үөрдэр.