Күннэй ыҥырыынан тоҕо ыллаабатын быһаарда

Күннэй айар үлэтин 30 сыл устата кэтээн көрдүбүт. Нарын-намчы бэйэтэ сороҕор мэник-тэник кыысчааҥҥа кубулуйар. Ол быыһыгар «Чээкэлээн» тэйэр, «Дьээбэлэнэн», «Гуголлаан» да соһутар.  

Кэнники кэмҥэ урбаан эйгэтигэр хорсуннук уонна чиҥник киирдэ. Аны покер турнирдарыттан кыайыы көтөллөнөн кэлэр буолла.

Киэн тутталларын өйдөөбөппүн

– Сарсын Төрөөбүт тыл, сурук-бичик күнүн бэлиэтиэхпит. Эн олоххор төрөөбүт тыл суолтата.

– Төрөөбүт тыл диэн киһи биир ураты өрүтэ. Ону таһынан, мэйиитин олоруутун, толкуйун уратыта.

– Аан бастаан саха буоларгынан хаһан уонна ханна киэн туттубуккунуй?

– Мин хайа эмэ омук буоларгынан киэн туттуохтааххын диэни өйдөөбөппүн. Хайа эрэ чопчу сиргэ киһи буолан ананан төрөөтөҕүҥ дии. Киэн туттуу туох эрэ ситиһииттэн тахсар, чопчу биир омук буолан төрөөһүн диэн ситиһии буолбатах, көннөрү сэрэбиэй. Хас омук уратылаах, онуоха бэйэҥ төрөөбүт омугуҥ уратытын сөпкө туһаҕа таһаарыахтааххын дии саныыбын.

– Сайа уонна Күннүк Уурастыырап тылларыгар элбэх дьүрүлү суруйбутуҥ. Эн санааҕар, ырыа тыла хайдах буолуохтааҕый?

– Хоһоон иһигэр бэйэтэ долгуннаах, дорҕоонноох, тэтимнээх буолар. Ону иҥэринэн, музыка тэтимин кытары дьүөрэлээн ырыа гынан таһаарабын. Хас тыл суолтатын хаспаппын, майгы хаамыытынан ыллыыбын. Ол иһин оҕо сылдьан уустук, дириҥ хоһооннорго ырыа айар буоллаҕым дии, суолтатын хантан тобулуой кыра оҕо.

Айымньы анала

– Биир интервьюгар ырыа айааччыны космостан кэлэр информацияны тиэрдээччигэ тэҥнээбиккин сэргии истибитим. Бу туһунан санааҕын өссө ситэрэн, сайыннаран биэриэҥ буолаарай...

– Айар киһи туруору ситимэ күүстээх буолар. Аан дойдуга биир информационнай накопитель баар дии саныыбын, онно хас түгэн, хас хардыы, хас аартык барыта тэҥинэн сурулла сылдьар. Айымньы диэн ол өйдөбүлтэн өссө уустук, кини элбэх киһи дьылҕатыгар үтүө суол хаалларар аналлаах, ол кэлэр күүһү айар киһи анаммыт дьонугар тиэрдэр, тарҕатар айылгылаах.

Ыллаан бүппүтүм...

– Былырыын айар  үлэҥ 30 сылын бэлиэтээбитиҥ. Дьэ эрэ, бу сыллар тухары сыанаҕа тугу гымматыҥ?

– Былааннаабыппын барытын оҥорон баран сылдьабын, ол иһин ыллаан бүппүтүм. Билигин бэйэбэр анаан эрэ ыллыыбын, ыҥырыынан ыллаабаппын. Айар үлэҕэ баҕа санаа күүһэ инники күөҥҥэ туруохтаах, харчы дуу, эбээһинэс дуу иһин диэн садаача чорбойдоҕуна, айар үлэ ыһыллар дии саныыбын.

Олох бэйэтин хаамыытынан баран истин

– Олоҕу планетаҕа эбэтэр «Диснейленд» пааркаҕа киирэн тахсыы курдук, баар карусельга барытыгар олорсон, онтон үтүө өйдөбүллэри эрэ илдьэ барыахтааххын диэбиккин сэргии истибитим. Оччотугар эн бу олоххо тугу боруобалаан көрө иликкиний? Урут-уруккуттан хаһаана сылдьар, ол эрээри санааҥ (илииҥ) тиийэ илик дьарыга баар дуо?

– Баҕа санаа кэлэн истэҕинэ утары толоро сатыыбын, билиҥҥи кэмҥэ кэлбит дьарыктарбын барытын холонон көрбүт курдукпун. Өссө туох эмэ кэллэҕинэ үөрүөҕүм, ол эрээри инникибин тымтыктанан көрбөппүн, олох бэйэтин хаамыытынан баран истин. Бүгүҥҥү күнү, билиҥҥи түгэни толору олоро, астына, сыаналыы үөрэнэбин.

– Өрөспүүбүлүкэ хас биирдии муннугар, чуолаан Лаптевтар муораларыгар  сылдьар баҕа санааҥ туолла дуо?

– Иликпин. Түгэнэ тосхойо илик быһыылаах, ыксаппаппын.

Эйгэ. Күүс

– Эйгэ киһини оҥорор дуу, киһи эйгэтин бэйэтэ оҥостор дуу?

– Киһи эйгэни бэйэтэ оҥостор, онтон ол эйгэ кинини оҥорор. Мин барытын бэйэм кыайбытым диир сыыһа. Эйигин тулалыыр, бэйэҕэр наардаан чугаһаппыт дьонуҥ эн өйөбүлүҥ буолаллар, кинилэргэ махтал, утары өйөбүл мэлдьи баар буоллаҕына күүстээх буолаҕын.

– Күүс ылар, өйдүүн-санаалыын сынньанар сириҥ.

– Майаҕа эһэм тэлгэһэтэ, Мырыла тыалара, Өктөмҥө дьиэм, тиэргэним.

Урбаан. Покер

– Урбаан эйгэтигэр ирдэбил күн-түүн кытаатан эрэр, үгүс тэрилтэ сабылынна. Оттон эн аны ас-үөл эйгэтигэр ылыстыҥ. Урбаанньыт быһыытынан үүнэргэ, улаатарга эйигин туох кынаттыырый?

– Биһиги дойдубутугар урбаан эйгэтэ – айар үлэ кэриэтэ. Мэлдьи үөйбэтэх өттүгүттэн тургутуулар кэлэ тураллар. Олору ааһар бэйэтэ оонньуу курдук.

– Покер турнирдарыгар хаһааҥҥыттан кыттаҕыный? Сорохтор өркөн өй күрэҕин курдук өйдүүллэр, сорохтор сүүйсүүлээх оонньуу курдук саныыллар. Манна тугу этиэҥ этэй?

– 2021 сылга тренер ылан, үөрэнэн саҕалаабытым. Миэхэ покер – оҕо сылдьан кыттар математикаҕа олимпиадаларым курдук, саҥаттан саҥа садаачалар. Теория вероятности, матстатистика, психология –  маны барытын түмэр олус дириҥ оонньуу. Киһи олоҕун кытары элбэх майгыннаһар түгэннэр бааллар. Покер билигин сүнньүнэн интеллектээх дьону түмэр, Арассыыйа үрдүнэн үгүс интэриэһинэй, өйдөөх дьону кытары билистим.

Киһи кэрэтэ ис туругуттан тахсар

– Эн тускунан киинэ дуу, кинигэ дуу айыллара буоллар, ханнык жанрдаах буолуо этэй?

– Арааһы устуохха сөп эрээри, абсурднай юмордаах байопигы ордоруом этэ.

– Ханнык ыйытыыга иэйэ-куойа хоруйдуоҥ этэй, ол эрээри ону ким да ыйыппатый?

– Оннук суох быһыылаах.

– Эн тускунан тарҕаммыт саамай күлүүлээх хоп-сип, сурах-садьык.  

– Элбэҕи истээччибин, оҕо сылдьан кыыһырар этим. Кэлин көрүдьүөс кэпсээн курдук интэриэһиргии, күлэ, үөрэ истэбин.

– Дьокуускай куоракка сөбүлээн сылдьар сириҥ?

– Саха тыйаатыра, бэйэм бардарым – «Глэм», «505», «Nature Republic» маҕаһыыным. Кэлин оҕолорбун кытары Филармония кэнсиэрдэрин сэргээн сылдьар буоллубут.

– Кэрэ буолууҥ кистэлэҥэ.

– Киһи кэрэтэ ис туругуттан тахсар дии саныыбын. Биллэн турар, спорт көмөтүнэн эккин-сииҥҥин тупсарыаххын, сөптөөх косметиканы туһанан, тирииҥ чөл буолуон сөп.

– Аны уон сылынан бэйэҕин хайдах көрөҕүн?

– Чөл, сэргэх сылдьыам диэн эрэнэбин. Атыны тымтыктанан көрбөппүн даҕаны.