Күүһүн көрдөрөөрү...

Мин 1958 сыллаахха ити үөрэххэ киирбитим. Иккис группалаах инбэлиит этим. Бэйэбит биэлсэрдээхпит. Түөрт уруогу үөрэтэн баран минньигэс, тотоойу аһылыгынан эбиэттэтэллэр. Икки чаас утуталлар. Туран чэйдээн баран эбии икки уруокка үөрэнэбит. “Бухгалтерский учет” бэрэдимиэккэ “Хатас” холкуос кылаабынай буҕаалтыра үөрэтэрэ. Туттуллар былааҥкалара, сыыппаралара барыта холкуоһун дааннайдара. Онно олоҕуран “Хатас” холкуос сыллааҕы балаансатын оҥорон таһаарбыппыт. Ол кэннэ миигин Нам 1-гы Хомустааҕар холхуос сыллааҕы отчуотун оҥорууга көмөҕө ыыта сылдьыбыттара. Үчүгэй усулуобуйаҕа олорон, үөрэнэн, инвалиднаһым сотуллан, 1960 сыллаахха үөрэхпин бүтэрэн, Мииринэй Арыылааҕар “Новай” сопхуоска үлэҕэ анаатылар.

Мииринэйгэ сөмөлүөтүнэн тиийдим. “Мииринэй – Мухтуйа трассатынан үс көстөөх Дражнайга (билигин Алмазнай – Аапт.) тиийэн баран суолгун ыйдараар” диэтилэр. Сатыы, самосвалга, матасыыкылга олорсон, онтон эмиэ сатыылаан (билигин Ботуобуйа муостата баар – Аапт.), Новай бөһүөлэккэ тиийдим.

Биэрэккэ киирбитим, өрүһү таҥнаран тыылаах киһи кэлэн иһэр. Көрбүтүм, билэр киһим Васильев Кеша эбит. Тыытыгар биир нуучча чиккэллэн сытар. Кэйиигин иһин күрүөҕэ хааллан турар атыыр оҕуһу икки муоһуттан ылан моонньун булгу эрийээри киирбитин, оҕус кинини өрө үөлэн ылан, илгистэ түһээт, күрүө нөҥүө бырахпыт.