«Көмүс мааска» национальнай бириэмийэ кыайыылаахтарын чиэстээтилэр

От ыйын 2 күнүгэр Ил Дархан Айсен Николаев Д.К. Сивцев-Суорун Омоллоон аатынан Опера уонна балет судаарыстыбаннай тыйаатырын «Сияющий камень» этно-балетын айар бөлөҕүн кытта көрүстэ. 

Бэлиэтээн эттэххэ, «Сияющий камень» этно-балет XXXI «Көмүс мааска» национальнай бириэмийэ үс номинациятыгар лауреатынан ааттаммыта: «Бастыҥ испэктээк. Балет», балет артыыһа Мария Кузьмина - «Бастыҥ дьахтар оруола. Балет», Иван Шандровскай «Бастыҥ уот худуоһунньуга. Музыкальнай тыйаатыр».

Айсен Николаев тыйаатыр дириэктэрэ Владислав Левочкиҥҥа, туруоруу айар бөлөҕөр эҕэрдэтин эттэ, үс номинацияҕа кыайыыны ситиһии улахан сыралаах үлэ уонна идэни толору баһылааһын түмүгэ буоларын бэлиэтээтэ, Саха сирэ бүттүүнэ кинилэринэн киэн туттарын санатта.
«Сияющий камень» этно-балет Д.К. Сивцев-Суорун Омоллоон аатынан Опера уонна балет судаарыстыбаннай тыйаатырын уонна Олоҥхо тыйаатырын кыттыгас бырайыактара. 
XXXI «Көмүс мааска» Арассыыйа тыйаатыр эйгэтигэр Национальнай бириэмийэтин кыайыылаахтарын наҕараадалааһын бэс ыйын 26 күнүгэр Татарстан Казань куоратыгар Г. Камал аатынан судаарыстыбаннай академическай тыйаатыр сабыс-саҥа дьиэтигэр буолбута. Быйыл куонкурска 170 куораттан 734 испэктээк кыттыыны ылбыта. 
Тэрийээччилэр санаталларынан, эһиилгиттэн бириэмийэ формата уларыйан, биирдиилээн номинациялар суох буолуохтара, наҕараадалар бүтүн испэктээк эрэ иһин туттарыллыахтара, диэн Ил Дархан уонна Бырабыыталыстыба пресс-сулууспата иһитиннэрэр.

Хаартыска: Саргын Скрябин, СИА