Күлэр-үөрэр кэммит чугаһаата

Дьэ, онно этиллэр күүтүүлээх кэммит элэҥнэтэн кэллэ. Бу кэмҥэ өрөспүүбүлүкэ килбэйэр киин куоратын Бааһынай ырыынагар, аттынааҕы Хомсомуол болуоссатыгар,  “Ас-үөл” быыстапка-дьаарбаҥканы эрэҥкэдийэ кэтэһээччи элбиир. Урут биир, бэркэлээтэр икки күн буолар тэрээһин кэнники кэрдиис кэмҥэ үс күннээх буолбута. Бу өрүү да бириэмэ былдьаһыгар сылдьар куораттарга олус табыгастаах. Оттон төрүт салааҕа күннэтэ-түүннэрэ сыралаһар күндү дьоммутугар, көмүс көлөһүннэрэ дохуот буолан төннөрө – туһугар күүтүүлээх.

Быйылгы, балаҕан ыйын 25-27 күннэригэр буолар, быыстапка-дьаарбаҥкаҕа, кырата, 80-тан тахса  хаһаайыстыба, тэрилтэ кыттыахтаах.

Ыраах улуустартан саҕалаатахха...

Өрүү кыттан тэйэр, быыстапка буоларыттан- буолбатыттан, сылы эргиччи куораты олохтоох бородууксуйанан хааччыйар чугас улуустары таһынан, ыраахтартан Сунтаартан, Ньурбаттан, Кэбээйиттэн кэлиэхтэрэ. Ону тэҥэ агрооскуолалар баар буолуохтара.

Сунтаартан – “Элгээйитээҕи ММК”, “Тирэх” СПОК, “Тускул” ХЭУо, “Благо 8” ТХПКК, “Потапов П.А.” ИП, Ньурба улууһуттан – “Сиибиктэ Ас” СПССПК, “Илгэ” СППК, Кэбээйиттэн – “Сайылык” МТС ТХПК, “Томтор” СПК, “Ворошилов” СХППСА, үс ИП, Бүлүүттэн – “Сыа Бүлүү” ТХППК кэлээри билигин ох курдук оҥосто сылдьар буолуохтаахтар. Хотугу улуустартан Абый эрэ кыттар чинчилээх:ИП Д.Г. Саввин тоҥ чыыры, уомулу аҕалыахтаах.

Оттон Дьокуускайтан?

Биир бастакынан, олохтоох аһы-үөлү бэлэмниир бөдөҥ тэрилтэлэрбит – “Дьокуускайдааҕы үүт собуота” ХЭУо, Дьокуускайдааҕы көтөр иитэр фабрика, Дьокуускайдааҕы килиэп собуота, “Туймаада” Агрохолдинг, “Туймаада” Экоферма ХЭУо, “Саха сүөһүтэ”  ГКП, ону тэҥэ “Ас-рыба” ХЭУо, “Улуус” ТХПК, “Саюри” ХЭУо. Биирдиилээн урбаанньыттар (ИП) – С.И. Петров, А.И. Гаевой, Т.С. Сухова, А.В. Свинобоев, И.С. Саввин, Т.К. Аркадьева, Д.Г. Челюк, У.Н. Торотоева, Д.А.Шевченко. Икки КФХ билиҥҥитэ суруйтарбыт – Н.М.Колесова уонна У.М. Слепцова бааһынай хаһаайыстыбалара.

Куорат урбаанньыттара уонна бааһынайдара, мүөтү бэлэмниир Анатолий Гаевойу аахпатахха,  эт аһы атыылыыллар эбит. Быыстапка буолуор диэри Дьокуускайтан кыттааччы, баҕар, элбиэ. Холобур, "Балык -Ас" кыттар буолуохтаах.

Дьаарбаҥкаҕа үрүҥ илгэттэн бэлэмнэнэр араас көрүҥ үүт ас дэлэй буолсу, балык ас эгэлгэтэ, көтөр этэ да баар буолуоҕа. Мүөт, оҕуруот аһа, барыанньа, икки хаһаайыстыба кымыһа уо.д.а. атыыланыа.

Онон хамнас, биэнсийэ, босуобуйа харчытын олоччу туттубакка, бээтинсэҕэ диэри ордоруннахпытына сатанар. Барытыттан да буолбатар, муҥар, биир-икки сөбүлүүр аспытын атыылаһан, астына амсайан, күһүҥҥү киһи быһыытынан үөрэр-көтөр инибит?

Дьаарбаҥка эрэ буолбатах

Бачча түмсүбүччэ, тыа хаһаайыстыбатын салаатын туһааннаах үлэһиттэрэ АГАТУ-га буолар сэминээргэ, стратегическай сиэссийэҕэ кыттыахтара. “Директор” диэн сахалыы киинэ сүрэхтэниитэ буолуоҕа. Өрөспүүбүлүкэ таһымнаах “Тыа сирин күүһэ” биисинэс-форум, үүнээйи, сүөһү-сылгы саалатын, ас уонна астыыр-үөллүүр бырамыысыланнас тэрилтэлэрин, хаһаайыстыбаларын ортотугар куонкурус, ол иһигэр “Үрдүк хаачыстыбалаах ас бородууксуйатын оҥорон таһаарыы иһин” күрэхтэһии тэриллиэ. Агрооскуолалар икки ардыларыгар эмиэ бастыҥнары талыахтара. Тэрээһини АПК үлэһиттэрин талба талааннаахтарын күүһүнэн бэлэмнэммит кэнсиэр нүөмэрдэрэ киэргэтиэхтэрэ. Ас-үөл бырааһынньыгын балаҕан ыйын 26 күнүгэр АГАТУ ипподромугар буолар ат сүүрдүүтэ силигин ситэрэн, тутулун тупсаран биэриэ.