Көҥүлэ суох сыбаалка тоҕо үөскүүрүй?

Евгений Григорьев уокуруктар уонна нэһилиэктэр управаларын салайааччыларын кытта куорат биир сытыы кыһалҕатын – санитарнай туочукалар нуорманы таһынан туолууларын дьүүллэстэ. Ол туһунан бэйэтин телеграм-ханаалыгар билиһиннэрэр.

Кэпсэтиигэ «Якутскэкосети» уонна «Жилкомсервис» тэрилтэлэр салайааччылара ыҥырыллыбыттар. 
Бары да билэрбит курдук, элбэх кыбартыыралаах олорор дьиэлэр, чааһынай да кыбаарталлар бөх тоҕор дьааһыктара сүрүннээн дьоҕус киоскалар таһаарар хоруопкаларынан туолар. Ол түмүгэр кытаанах бөх (ТКО) иэнигэр олохтоммут норматив хас да бүк аһара барарын управалар салайааччылара да, бөх тиэйиллиитигэр эппиэттээх тэрилтэлэр даҕаны биир киһи курдук этэллэр. Онон региональнай оператор мунньуллуохтаах бөх иэнин нуорматын хаттаан көрөрү туруорсар. Оттон оҕуруот аһын атыылыыр киоскалар таһаарар хортуон хоруопкаларын тиэйии иһин элбэх кыбартыыралаах дьиэлэр олохтоохторо төлүү олороллоро эмиэ сатамньыта суох. Аны туран, хортуон хоруопкалар бөх тоҕор дьааһыкка баппакка, санитарнай туочука аттыгар өрөһөлөнөллөрүн түмүгэр, көҥүлэ суох сыбаалкалар үөскүүллэр. Дьон манна массыына көлөһөтүттэн саҕалаан, миэбэлгэ, тутуу бөҕүгэр тиийэ таһааран кыстыыр. Бу хартыынаны бары күннэтэ билэ-көрө олоробут.
Онон куорат дьаһалтата 2025 сылга кэтээн көрүү камераларын салгыы туруорар былааннаах. «Инники 7 камераҕа эбии бу күннэргэ 2 туруоруллуоҕа. Быйыл уопсайа 20 саҥа камераны туруорар былаан баар. Ол көдьүүстээҕэ номнуо билиннэ – сокуону кэһээччилэр, буруйу оҥорооччулар ыстарааптаннылар», – диэн суруйар Евгений Григорьев. 
Санатар буоллахха, Бүлүүлүүр суол 9 км баар бөх тиэйэр полигон чааһынайдартан 1,5 куб. м диэри иэннээх бөҕү босхо тутар. Бу  миэрэ, бастатан туран, куорат территориятыгар уонна ойуурга көҥүлэ суох сыбаалкалар ахсааннарын аҕыйатар сыаллаах. Манна даҕатан эттэххэ, Бүлүүлүүр тракт 27 км тутуллар саҥа полигон 2028 сылга үлэҕэ киириэхтээх. 
Мунньах түмүгүнэн баһылык Евгений Гриорьев управалар уонна нэһилиэктэр салайааччыларыгар санитарнай туочукаларга эбии контейнердары туруорарга мониторинг ыытарга сорудахтата.