Көҥүлэ суох айан иһин эппиэтинэс күүтэр

Кыһыҥҥы кэмҥэ көҥүлэ суох сиринэн уу эбийиэктэринэн айан-сырыы иһин кытаанах эппиэтинэс күүтэр.

Чуолаан, СӨ Административнай быраабы кэһии туһунан кодексатын 9.10 ыстатыйатынан көҥүлэ суох сиринэн мууһунан тырааныспарынан сырыы-айан иһин:

- гражданнары 3 тыһыынча солкуобайтан 5 тыһ. солк. диэри ыстараап күүтэр;

- дуоһунастаах сирэйдэри – 20 тыһыынча солкуобайтан 50 тыһ. солк. диэри;

- юридическай сирэйдэри – 100 тыһыынча солкуобайтан 1 мөлүйүөҥҥэ диэри.

Бу дьаһаллар нэһилиэнньэҕэ сэрэхтээх буолууну хааччыйар, чараас мууска түһэн, быһылаан тахсыытын сэрэтэр сыалтан ылыллаллар. Чуолаан Дьокуускай куорат Олохтоох дьаһалтатын быһаарыытынан 203-с түөлбэнэн, «Намыв» ыстаансыйанан, Күөх Хонуунан өрүскэ тахсар көҥүллэнэ илик.

Быраабыланы кэһээччилэри ГИБДД, ЫБММ уонна Дьокуускай куораттааҕы Гражданскай оборонаҕа уонна ыксаллаах быһыыга-майгыга управление үлэһиттэрэ кыттыылаах эриэйдэлэр бэрэбиэркэлииллэр.

Санатар буоллахха, билиҥҥитэ Дьокуускай куораттан анараа биэрэккэ Хатаһынан эрэ суол көҥүллэнэн турар. Ол курдук, «Хатас – Павловскай» кыһыҥҥы суол СӨ тырааныспарга уонна суол хаһаайыстыбатыгар министиэристибин быһаарыытынан быйыл эрдэлээн, сэтинньи 29 күнүттэн арыллыбыта. Маршрут кэтээн көрүү камератынан, ыйааһыны хонтуруоллуур пууннарынан хааччыллыбыта.

Оттон «Дьокуускай – Аллараа Бэстээх» хайысханан өрүһүнэн кыһыҥҥы суол 2026 сыл тохсунньу саҥатыгар арыллара күүтүллэр.